《施政報告》出咗爐差唔多成個月，特首林鄭月娥差唔多日日都有活動要去，轉眼間聽日立法會就會辯論《施政報告》致謝議案。作為特首，林鄭絕對無放過任何一個機會去Sell吓自己嘔心瀝血嘅《施政報告》。

其實林鄭早前都有喺Facebook出Post話『留屋留人』方案實現咗一個不可能嘅目標。(林鄭月娥facebook圖片)

林鄭重提有份堅持「留屋留人」

　　話說今日林鄭去咗個社企民間高峰會，致完辭之後就有個對談環節，佢都不忘同嘉賓分享吓佢嘅文化保育政策，講到灣仔嘅藍屋建築群，最近拎到「聯合國教科文組織亞太區文化遺產保護獎」入面嘅最高榮譽的「卓越獎項」，話其實當年自己喺政府都有份堅持「留屋留人」呢個方案，所以自己都「好自豪」喎！

　　其實林鄭早前都有喺Facebook出Post，話活化藍屋：「係一個『留屋留人』嘅活化歷史建築項目，當年看似不可能嘅目標，今日終於實現」。不過，就引嚟立法會議員朱凱廸（阿廸）留言，話「藍屋留屋留人方案不是政府的原建議，而是居民同社區組織長期抗爭後，特區政府選擇性妥協的個案」，仲話「唔該唔好當係政府自己的功勞」。

當日阿廸去林鄭fb留言，獲網民狂推。

當年火頭太多「藍屋」至獲放生？

　　Jenny都記得當年房協話想將藍屋變成博物館，嗰陣真係惹嚟好大迴響。不過林鄭個Facebook一向都唔會回應留言。林鄭今日喺個活動上又提多次，Jenny梗係要問吓阿廸有咩回應啦！

　　阿廸就同Jenny講，覺得林鄭好似「將功勞攬上身咁」，雖然個方案係佢「點頭」放行，但都唔應該忽視咗幫政府諗呢個方案嘅居民同埋社區組織。阿廸仲話，嗰陣同期其實政府有幾個項目做緊，時任發展局局長嘅林鄭當年企硬要拆皇后碼頭，而荷李活道已婚警察宿舍同藍屋就接受，畀人嘅感覺就好似「有十個火頭，殺最大嗰一個（皇后碼頭），放生兩個畀你」，而且藍屋之後，都唔見政府有更加重視呢類嘅民間參與，所以都唔係好覺得政府真係咁尊重歷史喎！講講吓，Jenny不禁諗起，如果當年皇后碼頭都有堅持唔拆，話唔定香港仲可以拎多個獎呢……