修改《議事規則》嘅戰爭終於殺到！議會兩大陣營唇槍舌劍、你來我往立立亂，Jenny同一眾行家今日都疲於奔命，但係做人總要學懂苦中作樂嘅，就等小妹同大家分享吓！

碧雲姨見到邊個大嗌「性騷擾啊！」？睇埋落去就知！

阿Paul忽爆seed　鬧完人「傻仔」即戴頭盔

　　其實建制想快啲開始搞議事規則，只要大家唔講嘢，由得民主派自己噏嘅話，點都有數得計嘅！不過身為議事規則委員會主席嘅謝偉俊（阿Paul）就似乎沉唔住氣，要發言爆seed,一次辣著兩個火頭!

　　今日個會一開始仲要講埋噚日未講完嘅《實習律師修訂規則》嘅中止待續，阿Paul發言。佢就大鬧民主派「講埋啲廢話」，仲點名話醫學界陳沛然「話成日想知道多啲關於專業嘅嘢，關於好多咩民生無小事，通通係廢話」！仲話「聽得廢話多，真係會令人癲」添！阿Paul一個屈尾十，拉埋鄺俊宇(鄺神)落水，話如果民主派發言嘅人都好似鄺神咁，「仲可以笑吓呢條傻仔都幾得意」。

　　阿Paul指名道姓咁講，梗係會被人覺得冒犯喇！佢之後都快快脆戴返個頭盔，收返「傻仔」言論，但係都係要講多句：「佢唔係傻仔，起碼喺我眼中，喺市民眼中唔知佢係乜嘢，不過唔係傻仔，OK？」Jenny都幾疑惑，其實同冇收返有咩分別呢？

「才子」大戰碧雲姨　Ann姐想幫拖被拒

　　第二個花絮就「漁農界才子」何俊賢大戰民主黨黃碧雲（碧雲姨）。俊賢兄唔知係咪都想發揮吓「才子」本色，發言拋書包：「治世不一道，便國不發古」，話議事規則漏洞多多，而家修改係完成「萬世壯舉」！Jenny直情覺得「才子」背後好似有段激昂嘅背景音樂播緊咁呀！

　　跟住「才子」又窒碧雲姨「思覺失調」，被碧雲姨投訴，代主席李慧琼就話，碧雲姨發言時都有話建制派「發羊吊」，認為有關字眼「係病徵，冇侮辱性」，碧雲姨就反駁自己冇無指名道姓，但係何俊賢就有，令佢心靈受創云云。

　　戰況咁激烈，連Ann姐蔣麗芸都想加入戰團，不過「才子」就即刻勸止：「得得得Ann姐，唔使（加入）喇！」、「唔使喇，等我嚟！」睇嚟Ann姐嘅威力，連自己嘅黨友都驚驚呀!

何人斗膽性騷擾碧雲姨？

　　入到戲肉處理議事規則喇！民主派邊有咁順攤呀，一嚟就係咁提規程問題，又喺位到舉標語同嗌口號，大主席就宣布暫停會議先。休會嘅時間，民建聯嘅葛珮帆（EQ）就玩起live，直播吓議會情況，點知就被碧雲姨攝鏡，仲舉埋反對修改議事規則嘅紙牌添！

　　特約攝影師周浩鼎就即刻移走鏡頭、麥美娟又用頸巾遮，但都失敗。旁邊阿Paul想出手，點知碧雲姨見阿Paul愈行愈埋，竟然大嗌「性騷擾啊!」！阿Paul聽到即刻一個轉身，面黑黑咁行出咗議事廳喇！

阿Paul耍完功守道仲識七傷拳？

　　最後一個花絮嘅主角又係阿Paul！上次Jenny喺內會見到阿Paul耍「功守道」耍得頭頭是道，佢今日又嚟多次，不過就係玩「七傷拳」。其實事緣係佢鬧非建制派嘅拉布係「塔利班」式，惹起非建制派不滿，覺得佢係冒犯，跟住大家就因為「塔利班」呢個詞互噴，擾攘一輪。

　　阿Paul都承認，改議事規就好似「七傷拳」咁，令議員嘅權力削弱，但係而家情況咁惡劣，點都要撥亂反正，即使係「斬腳趾避沙蟲」都要「斬」，因為「唔斬就會死」喎！嘩！阿Paul「功守道」又識，七傷拳又領悟得咁透徹，不如諗諗轉行做武師吖？