本身今日星期五，Jenny就唔使追住立法會啲會係咁聽，不過因為大會主席梁君彥之前講到明今次要加開4日會，仲要日日都朝9晚8，Jenny都只能「捨命陪主席」啦！所以小妹今日又要坐足成日立法會喇！不過立法會除咗有點人數嘅鐘聲陪伴Jenny之外，今日仲多咗兩種「音樂」添！

阿廸一早用鐵鏈將自己綁喺座位，保安唔知喺邊變把大剪出來剪斷咗鏈。

EQ發言撞正踏9 黨友即刻閃人走

　　Jenny今日一早就返到立法會等大會開始，點知會都未開，民主黨許智峯就拎出佢哋噚日發言時嘅警報器出嚟再㩒響多次，結果就俾主席驅逐離場，仲要今日之內都冇得返回會議廳！

　　唔講大家可能唔知點人數係有個「慣例」㗎！每逢到踏9就點，就算冇叫點人數，建制派都自動自覺咁行出會議廳。點知輪到民建聯議員葛珮帆(EQ)發言嘅時候啱啱好10點9，建制派嘅議員都陸陸續續咁走咗，不過民主派就冇叫點人數，EQ當刻都好無奈咁話「得返兩個人喺到……」

　　Jenny明白嘅，EQ身為建制一員，冇可能主動嗌點人數㗎嘛！民主黨譚文豪見EQ咁慘，就話「我見你都辛苦啦！」就幫佢叫點人數。Jenny覺得呢個泛民與建制「合作」嘅畫面實在難得！

樓下就一班小學生用天真嘅聲音唱聖誕歌，其實都幾諷刺。

場外樂韻悠揚 場內警報嗡嗡響

　　講起點人數，日復日Loop不停嘅點人數鐘聲之中，今日Jenny終於聽到不一樣嘅「鐘聲」，就係Jungle Bell 喇！事緣劍拔弩張嘅立法會中午有個「午間音樂表演」，有班小學生嚟同議員們齊齊唱聖詩，同大家慶祝聖誕節！不過Jenny心諗，今日明明要打仗，議員們仲有時間去聽歌咩？到表演就快開始嗰陣，Jenny又真係見到立法會主席梁君彥、教育界葉建源同埋醫學界陳沛然落咗去樓下，戴起聖誕帽扮吓Cute，同一班小朋友影相，跟住就聽佢哋唱聖詩。

　　不過場內同場外從來都係兩個世界，喺場外嘅主席就欣賞緊優美悠揚嘅聖誕歌聲，場內嘅代主席就要處理嗡嗡作響嘅警報聲。呢啲警報聲原來係來自朱凱廸（阿廸），阿廸喺座位拉起「不做人大」嘅橫額同埋高叫口號，又再次㩒響佢哋寓意「叫醒裝睡的人」嘅警報器，最後代主席命令阿廸退席，原來阿廸一早用鐵鏈將自己綁喺座位唔願離開，保安將鐵鏈剪開後抬走咗阿廸，前後擾攘咗10分鐘左右，又慢慢回復平靜。Jenny坐喺記者區，聽住兩邊截然不同嘅「音樂」， 真係覺得好諷刺。