大家係唔係加咗人工冇耐呢？咁就啱喇！事關根據港鐵嘅「只加不減」機制，今年港鐵又加價喇！你份新人工咁又冇咗截喇！

　　可能有人會話，上年港鐵咪凍結咗票價囉！No～no～no，少年，你太年輕了！其實上年港鐵計過條數，係加1.49%，不過因為未觸及啟動加價嘅機制，咁個加幅就要帶落嚟今年一次過加。今年本身係加1.65%，計埋上年條數，所以今年「一鋪過」加3.14%！

全日通凍結票價半年？

　　年年都加價，港鐵點都要做返啲嘢嚟安撫吓乘客，不過Jenny睇返佢今日公布嘅「優惠措施」，就忍唔住學肥媽唱返句：「嘥氣～～～～～～～！」

　　嗱！港鐵今年主打3個優惠，不過其實有2個都唔知可唔可以真係叫做「優惠」。呢2個「優惠」就係繼續有每程97折；同埋月票、都會票、屯門至南昌的全日通票價，維持半年不變。兩項「優惠」都係下年１月１日完結。大家細心一睇，就會諗到97折係用嚟抵銷嗰3.14%嘅加幅，咁其實呢2個「優惠」只係相當於凍結票價半年。既然冇平過，又何來優惠呢？

一日慳6毫 成個月巨無霸都買唔到

　　仲有個優惠係同綠色小巴一齊搞嘅轉乘優惠，Jenny一聽，有新嘢噃！原來係由港鐵轉小巴，定係小巴轉港鐵，都可以有3毫子優惠，仲涵蓋超過500條小巴線添！不過每日只可以用2次優惠，如果每次儲起呢6毫子，一個月30日，即係18蚊，勉強夠去麥記買個孖芝（價值$17.5），巨無霸都買唔到呀！陰公！唔知要儲起幾耐先買到個飯盒食呢？

　　其實港鐵搞咁多花臣，都未必挽回到市民嘅心，事關大家嘅心願都已經講咗好多年：就係直接減價！不過照住呢個「只加不減」機制，唔知Jenny有冇幸可以睇到港鐵減價嘅一日呢？