今日係六四事件29周年，有些事從來都係不想回憶，未敢忘記。唔少組織都會有各種行動悼念、表達對六四嘅關注等，尤其是年輕新一代點睇六四。本港最後生嘅政團香港眾志就學啲網媒咁，做咗條街頭訪問片，希望引起大家關注六四認知斷層的問題喎！但係唔睇尤至可，一睇，如果有讀過吓少少傳播理論嘅人士（包括Jenny）相信都會「把幾火」喇！

　　是咁的，佢哋條片就搵咗幾個身穿校服嘅中學生做訪問，先以經典電影場面畫面截圖，問佢哋識唔識係咩電影；之後就拎出一張有關六四事件嘅相問佢哋知唔知呢件事。有學生妹似乎就唔係好願意受訪，係咁避鏡頭，妹妹最後一句對「清場」睇法嘅Comment：「OK嘅」，就惹來網民撻伐。

　　事後有傳媒人問返先知，原來妹妹要求打格仔才願意接受訪問。咁姑勿論唔應該用兩樣唔關事嘅嘢（即香港電影同六四）相提並論，畀咗個錯誤嘅信息他人；人哋講咗話要打格先接受訪問，你就冇理到直出，係唔係太唔尊重受訪者嘅意願呢？

知瀨嘢刪片 但又怪責人？

　　眾志事隔兩日，終於都Feel到今次瀨嘢，今日中午就出咗個道歉聲明同埋刪咗條片。不過Jenny睇返佢哋個聲明，感覺上又係一場新嘅關公災難……

　　即係咁，Jenny覺得最出事嘅就係以下呢段：「惟當時街頭環境嘈雜，可能導致受訪同學沒有專注問題或失去耐性。在沒有確保同學有足夠思考下作答，繼而轉載他們的答案，是我們的失職」。Oops！點解有種跌落地都要拿返渣沙嘅感覺？話就話係自己失職，又要埋怨人哋唔專心。Sorry！咁樣真係誠意欠奉囉！Jenny相信，如果冇咗嗰句「可能導致受訪同學沒有專注問題或失去耐性」，成件事會好好多囉……

　　其實眾志由中學生組織一路走來，到而家大家都上到大專、甚至畢業，做人、做政團都好，處事都唔應該再好似中學咁㗎啦！而且話晒自己都仲係學生團體，但今次條片無疑就係趕班中學生客。有網友都感嘆：「班同學仔以後提六四，唔會即刻諗起屠城，而係記得當日眾志點老屈佢地（哋）……」唉！眾志仲話想透過條片「有效地傳承六四歷史」，而家咁搞一搞，話唔定反而係推走咗班潛在嘅00後支持者！

記憶與遺忘的鬥爭

　　著名作家Milan Kundera都有講過：The struggle of man against power is the struggle of memory against forgetting.（人類對抗權力的鬥爭，就是記憶與遺忘的鬥爭。）悼念六四係有需要傳承落去，真相亦不應被淹沒在歷史洪流當中。不過眾志以此方式嘩眾取寵，又同佢哋批評開嘅對家有咩分別呢？睇嚟眾志都要惡補吓公關技巧喇！事關「做人冇公關」下一句係乜，相信眾志對經典對白咁熟，唔駛Jenny講都知喇！