之前有調查就發現，今時今日喺香港，唔少大學生一畢業就想投身公務員或者執法機構，因為薪高糧準呀嘛！今年春季嘅警隊招募都收到超過2000份申請，數字係歷屆春季招募日第二高！至於而家身為警務處「一哥」嘅處長盧偉聰，當年又點解會揀做警務人員呢？

一哥話自己細細個就好鍾意「做班長、管人、守紀律」㗎啦！

　　今日一哥就去咗書展同年輕人交流，席間就透露咗呢個秘密畀大家聽：原來佢細個嗰時最鍾意就係「做班長、管人、守紀律」，同做警察嘅特質好相似。佢仲話，唯一最記得被老師罰嘅經驗，就只有喺小一嗰陣，因為上堂傾偈，被老師罰打手板咁大把。

　　一哥仲話，自己讀書時最鍾意睇《三國演義》，好欣賞啲將軍、謀士咁話喎！不過當時未諗到立志要做警察嘅，但相信或多或少都影響到自己最後對職業嘅決定，所以大學嗰時就決定去報考警隊喇！

　　不過，做班長同做警察一樣，經常都要處理衝突，難免會遇到一啲唔開心嘅情況出現。有同學仔就問一哥點樣控制情緒先？佢就話自己一向都唔輕易發脾氣嘅，因為唔會將人哋嘅說話太上心，每個人都有言論自由，唔同意都好，都係要尊重其他人嘅！Jenny都覺得，如果警隊訓練時可以加強下呢方面嘅內容，甚至搵一哥親自教授，話唔定警民衝突都可以少好多呢！