上回講到立法元老級議員梁耀忠(阿忠)打死都唔肯「主席」，激到劉慧卿姐反晒白眼。原來立法會仲有一個人同阿忠諗法有啲似，未至於耍手擰頭，但講到做「主席」都要諗過度過，原因都係怕冇得暢所欲言，佢就係建則規園界嘅議員謝偉銓(Tony)喇!

Tony重返議會之後都做咗唔少嘢。

　　Tony今日就約咗一班傳媒茶聚，當然包括小妹Jenny啦!席間佢少不免同大家分享下重返議會4個幾月做過咩嘢，佢都算係幾勤力，提出咗3條口頭質詢、7條書面質詢、仲質詢咗特首兩次，加入共17個大大少少唔同範疇嘅委員會。

主席唔易做 Tony要度度

　　不過，問到10月復會後有冇興趣趁事務委員會改選主席，去搵返個主席做吓咁呢?Tony就笑笑口話要再諗諗喇，因為唔做主席就可以多啲時間講嘢，做咗就冇得暢所欲言，要花嘅時間又唔少，不過佢就覺得如果係自己可以為業界發揮作用都會爭取來做，例如以前佢都做過物業管理條例嘅法案委員會主席。睇嚟佢冇染上「做主席恐怖症」噃!

醫療要有Hong Kong style!

　　Tony作為建則規園界議員，都好關心個粵港澳大灣區規劃會點，佢就同Jenny講佢手頭上消息就係好快就有公布，係咪8月內出臺佢就冇講實，只係話今年內一定會公布。Tony你咁講，擺明大包圍啫 !講講吓，就講到有人提議大灣區整個「香港城」畀港人北上養老，Tony就話最緊要入面文化同制度似香港，咁先可以吸引人搬過去，而家老人家都好潮，如城內可以上facebook同ig係值得考慮，但佢就覺得最最最重要係醫療服務同管理係Hong Kong style!!