「山竹」吹襲過後，唔少港人助人自助，加上清潔工人、各政府部門機構、巴士公司、港鐵等的員工努力之下，最重要嘅交通問題都叫解決得七七八八，不過路面啲冧樹、垃圾、玻璃碎仍然未完全清理好，市民行過都要小心！Jenny噚晚就見到一直有司機接送嘅葉劉都喺Facebook出Post，話佢都要行路返工噃！睇見佢為咗捍衛髮型，用膠袋包實個頭，行喺樹蔭下，成個造型好趣怪！

有冇令大家諗起一首歌嘅歌詞呢？（葉劉Facebook圖片）

白加道住要人 有得優先善後？ 

　　「山竹」橫掃之下，周街都係冧樹，唔少打工仔噚日都要「爬樹」返工。作為山頂區居民嘅葉劉亦「成就解鎖」！話說，佢噚日準備同一眾打工仔一樣準時返工之際，出門時就收到司機大佬同佢講堅尼地道有百年古樹倒塌、波老道一帶都有唔少塌樹，啲車行唔到入去，所以佢就決定貫徹港人嘅「獅子山精神」，一於包住個頭，唔理對名牌Tory Burch平底鞋會唔會花，行半個鐘落山返工，放工再行返半個鐘上山！

　　睇到尊貴的立法會議員兼行會成員咁貼地，Jenny覺得非常少見，點都要畀個Like啦！葉劉仲話，佢噚日已經就冧樹向當區區議員、前教育局政助楊哲安「求救」同反映，楊哲安就同佢講，政府部門首先要處理馬己仙峽道同埋白加道一帶嘅冧樹，因為馬己仙峽道係山頂出入市區的主要通道；至於白加道，葉劉就估係因為嗰度係政務司司長、各國駐港總領事住嘅地方，所以要快啲搞掂喎！Jenny覺得呢啲位，真係好現實呢！係咪？

寄望特首不如望老闆有良心

　　超強颱風「山竹」唔止留低咗大大個殘局畀香港，仲留埋畀我哋特首林鄭噃！全城鬧爆冇得停工，特首林鄭似乎「未驚過」噃！佢今日開行會前見傳媒，就主動再提「山竹」，話噚日出席咗4個公開場合，有唔少人公開或私底下對佢轉達今次港府處理得好好；又話好高興見到市民自發清理道路云云。

　　面對幾乎全城齊「派嬲」，林鄭就話完全可以體會市民嘅憤怒；仲話「咁嘅情況下市民攞特首出氣完全冇問題！」唉！Jenny就認為，「工」再唔想返、再難返、再狼狽，都返咗喇！拎你嚟出氣都無補於事，不如寄望呢個世界有更多良心僱主仲實際。

　　其實，直到今日，路面仍然未完全清理好，Jenny只係覺得，如果噚日真係可以停工一日，可能更加能夠有多啲人願意自發清理，回復進度就會更好！另外有報道指，今朝有工人喺清理冧樹嘅時候，隔籬嘅鐵圍欄連樹椏突然倒塌，3個工人被割傷手同腰背部。Jenny都知大家好想快啲幫香港回復原貌，但係都要小心為上呀！