等到頸長嘅《施政報告》終於嚟喇！特首林鄭都講到明，今年《施政報告》嘅重點係土地房屋，再加上呢幾個月佢力Sell填海，所以Jenny都估到今年嘅重中之重，唔駛問梗係政府同智庫煲咗好耐嘅「東大嶼都會」喇！

林鄭同華仔心有靈犀？

　　今日份好似海洋咁藍嘅《施政報告》一出，果然有好大篇幅講東大嶼填海，仲起咗個好似好有未來嘅名叫「明日大嶼」添！小妹一睇，之前政府話填海1000公頃，今日已大幅增加到1700公頃，啲內容仲同團結香港基金嗰邊好似添！唔通林鄭真係請咗佢哋做幕僚？但係呢啲嘢係要公開先得噃！

　　有行家就向林鄭提出呢個疑問，林鄭就話，其實佢自己第一次睇條片嘅時候都好驚訝，點解連啲用字都同《施政報告》咁似嘅？但林鄭就強調大家都「冇夾過」嘅！佢仲主動幫配旁白嘅「民間特首」劉德華抱不平，話佢因為呢條片而被人人身攻擊係好唔公道添！

幫完抱不平仲幫手宣傳

　　幾時都話華仔魅力沒法擋，就連林鄭提起都心花放咁款！佢話雖然唔知段旁白係唔係華仔自己寫，但得知佢都支持填海，估計係因為自己同華仔都係同一個年代成長，「或者我大佢幾年喇！哈哈！」大家亦都係出身基層，而家又喺各自嘅範疇取得成功，都會希望幫吓下一代，而唔係個個都講聲移民就走咗去喎！Jenny查一查，其實林太只係大華仔4年4個月左右咋！

　　林鄭仲話，華仔因為呢條片而被網民人身攻擊，係非常唔公道！佢為華仔肯勇於表達意見表示敬佩，仲預祝佢12月演唱會成功添！Jenny醒起，林鄭之前都有去過聽「譚校長」譚詠麟嘅演唱會，今次華仔咁捧填海場，林鄭又會唔會去捧吓佢個演唱會場先？