之前有報道就話林鄭想換走政務司長張建宗（張宗），消息愈傳愈犀利，個風吹到咁「行」，雖然林鄭唔止一次話「冇啲咁嘅事」，但至於你信不信，Jenny就見到大部分人都真係唔多信喇，但就口痕推論如果張宗真係被「炒魷」，就可能由現任商經局局長邱騰華任張建宗個位！

葉劉有更猛消息來源？

　　點解要換走張建宗？消息就話係因為林鄭準備要推《基本法》23條喇，仲諗住拉埋政務司司長落水添！不過以張建宗咁「玄」嘅說話技巧，搵佢答質詢就難搞啲，所以就希望搵個「更有魄力」嘅人頂上。

　　消息一直係咁傳呀傳……殊不知今日連行會成員之一嘅葉劉，喺電台節目都話「堅」？唔通葉劉就係放風之人？Jenny即刻去聽返葉劉原句先，原來佢係話：「我都問過新聞來源，佢哋話『呢個料好堅！』」原來咁咋，嚇得Jenny吖！不過葉太，放料嘅人多數都會話自己係「堅」嘅……

又係時候出動「張太」……

　　Jenny就記得，之前律政司易帥嗰陣，林鄭被問到袁國強係唔係會離任嘅時候，佢就好曖昧咁話：「今日特區政府嘅律政司司長仍然係袁國強先生」，冇直接否認消息；但面對今次換政務司司長，林鄭就答得好明確：「我可以喺呢度證明係揣測性報道，我目前冇任何呢一方面嘅計劃。」講得咁絕對，Jenny睇嚟只係剩返一個可能性，就係張建宗「自動請辭」喇。不過以張建宗對返工嘅狂熱程度，要佢「自動請辭」恐怕要出動「張太」喇！