農曆新年就到，唔少市民喺呢幾日應該都有行年宵，辦年貨同埋感受下節目氣氛喇！就嚟要交「功課」嘅財政司司長陳茂波（波叔）都唔例外，佢今日就去咗維園，出席經民聯個檔口開幕禮，順便行下花市，但係有人塞錢到佢手都唔肯接喎！點解嘅？點解嘅？點解嘅？

被「嬲嬲」沒頂 波叔有餘悸

　　波叔喺經民聯個開幕禮都有份開金口致辭，佢話，一入嚟就見到好多隻豬，仲自嘲話包括近期佢最熟嘅「嬲嬲豬」，睇嚟佢都對上次Facebook直播時被「嬲嬲」沒頂嘅情形心有餘悸噃！不過，財政司司長，波叔三句唔埋就講經濟是常識吧！佢話，今年狗年「隻狗仔好百厭」，去到年尾就靜啲，因為去到第四季嘅經濟增長就比第三季慢。佢又希望下年豬年大家可以「家肥屋潤」喎！

波叔棄座駕 真相係……

　　完成任務之後，波叔就去咗行年宵，仲幫襯咗幾間學生檔，買咗啲豬公仔同埋福袋等產品，不過之後就遇到社民連成員示威喇！今年社民連嘅年宵商品就有個「萬億攬枕」，諷刺政府個「明日大嶼」計劃係一個要用成萬億埋單嘅大白象工程。佢哋就打算送呢個攬枕畀波叔，但係就被保安一手阻止。

　　波叔有諗過上返佢架紅色座駕走人，不過就被示威人士擋住咗，最後波叔諗咗諗，竟然棄座駕而去，去咗搭港鐵，嘟八達通嘅手法仲好純熟添！Jenny當然即刻向波叔嘅政助何翠萍（Apple）八吓，波叔何解連座駕都唔理就走佬，Apple就話原來波叔趕住去中環出席飯局，所以咪選擇搭港鐵，Apple仲透露波叔除咗會不時搭港鐵之外，仲鍾意去快餐店食焗豬扒飯，都算係個「貼地波」嚟㗎！嗱！各位如果有幸野生捕獲波叔，相信佢都唔介意聽大家呻吓嘅，等波叔聽多啲，第時推政策可以都貼地啲吖嘛！