Jenny記得今年年頭政府就頭頭踫著黑，啲政策一跪再跪，其中一個就係《施政報告》提過嘅「三隧分流」方案。

要加價就勢係假

　　本身「三隧分流」個概念跨黨派都好認同嘅，點知運房局掟出嚟嘅方案，就係紅隧同東隧嘅私家車收費分別加到去40蚊，西隧就減到50蚊。紅、東隧加足成倍咁滯，市民梗係牙痛咁聲啦！今年仲要係區選年，啲議員自然面都唔畀，齊齊嗌反對！所以政府最後都係臨門撤回原本諗住1月交上立法會嘅議案。

配菜「智慧交通基金」 難掩主菜難啃

　　Jenny以為運房局「跪」咗一次，應該冇咁快再闖第二次啦啩？點知今日運房局局長陳帆（帆哥）就開記者會，公布今個月27號又會交方案上立法會喇！咪住先，個方案冇郁過咁嘅？帆哥就話，新方案加咗兩個措施，一個就係將喺紅隧同東隧收多咗嘅9億隧道費，用嚟成立「智慧交通基金」，可以推動同車輛有關嘅創新科研究；同埋會展開「擠塞徵費」研究，會喺2023年政府收回西隧經營權前完成檢討，其後落實新收費建議。但係帆哥呀帆哥，你都只係加咗啲配菜，個主菜都冇變過噃！

　　方案換湯唔換藥，一班「忠實Fans」想撐都撐唔落啦！民建聯同工聯會都話，要等佢哋黨投完票先有決定，不過個方案收費都冇變過，好難支持得落囉！都係嗰句，區選近了，你懂的！