佔中案呢兩日可謂霸盡各大報章頭版，案中九人噚日就定咗罪，今日就繼續求情，求完之後法官就押後到今個月24日判刑。各大陣營陣都係時候發表意見，歡呼的歡呼、遺憾的遺憾，都係意料中事。

不能讓民記專美？

　　九個人都有控罪罪成，就已成定局，所以噚日民主派就喺法庭宣布休庭之後，半個鐘內就咋咋臨出咗份聲明，表示對法庭完全唔將公民抗命放在抗辯考慮之列表示遺憾；而建制派大佬民建聯（民記）當然同樣要發聲明表態，話判決彰顯公義啦！

　　大家本身都做好咗自己的份內事就相安無事，點知啱好噚晚民建聯選管理層，行家們就梗係趁呢個機會扑返咪攞回應啦！有片有Bite存在感點都大啲嘛！

　　民主派可能有見及此，就覺得齋係出聲明冇片，輸咗畀對家添！都係要開返個PC蒲個頭先！

只讀聲明稿 算是PC嗎？

　　Jenny同一眾行家就喺PC前一個鐘收到採訪通知，不過就淨係話民主派會開PC，無話係為咩事。咁啱Jenny喺走廊上撞到民主派會議召集人毛孟靜（Miss Mo），即刻問下佢到底所為何事啦！Miss Mo就話係回應佔中九子喎，之後細問之下先知原來PR姐姐未講清楚。Miss Mo又話，點可以人哋講完彰顯法治我們卻無去講呢，所以就有呢個PC啦！

　　不過，其實民主派噚日已經出咗一份聲明，今日再出一份內容分別都唔大，都只係公開再讀多次。Jenny以為重頭戲會喺後面嘅Q&A，點知Miss Mo讀完聲明之後，就話由於而家都暫時未有判刑，所以佢哋而家唔會就任何判刑嘅揣測作任何評論。

　　吓？！咁同無嘢回應好似冇咩分別噃……結果讀聲明就用咗約5分鐘，Q&A都係5分鐘左右就收工，有行家就講笑咁講話，成件事就好似交Form咁，順便打個卡呃個Like就算數喇！唔怪得行家反晒白眼㗎！