你叫Jenny如何再相信愛情？！今日中午一段「安心飛的」片令全Office、所有版面的同事、行家都熱烈討論，總結而言就係：「世界真係冇童話！」好多嘢都唔可以一廂情願，愛情如是、政治如是。「安心偷食」事件一下子成為全城熱話，原本噚晚大家望住心痛嘅巴黎聖母院大火、鬧哄哄嘅《逃犯條例》修訂、削醫委會權、國歌法都冇人講咁滯。

廉署出PO 叫停Cheating

　　婚外情，即係Cheating啦！廉署個fb Page喺「安心飛的」片爆出之後，極快有反應！出Post連拉埋誠信一齊講：【Cheat精Cheating斷到正】咪以為保密功夫做到足就可以Cheating，數碼足跡、天眼到處都係，要搵貪污證據，其實唔難，邊有咁易走得甩！？仲有一大串Hash Tag：

#正Cheat精 #Cheating #人太貪婪心盲無明 #貪念是一條大坑會坑掉人的哦 #SoSad #教而不善 #收授雙方一齊玩完 #貪心邊有得咁安心 #要學識制服心魔同誘惑 #現實離奇過劇集 #以為瞞天過海其實係你愚瞞

　　呢個Post Jenny都覺得抽得正常、恰到好處同有意思。

趙家賢抽錯火水

　　但有啲抽水，Jenny就覺得似乎唔太對路。事件爆出之後，馬國明住的太古城即時多咗好多娛記，當區區議員之一嘅民陣召集人趙家賢亦都抽水，出咗個#區務報告Post（見圖）點知就抽水抽著火水，畀人鬧佢喺人地傷口灑鹽。

　　所以轉個頭佢就Del Post，改左口吻，只係話現有大量娛樂記者出現在太古城並發生滋擾居民情況。已通知管理公司跟進，要求加強大廈保安及協助被娛記滋擾的居民解圍。

學高官講野拆唔拆得掂？

　　嗱！所謂一個巴掌拍不響。男主角就率先開記招回應，不過計Jenny話，男女主角「沿途與他車廂中私奔般戀愛，再擠迫都不放開」有晒片段做證，就點都拆唔掂喇，既然大錯已經鑄成，與其賴醉酒累事，Jenny建議佢哋可以學下高官回應部門錯失時嘅說法。例如參考政制及內地事務局局長聶德權，佢回應遺失選民資料嗰時咁講，「我哋一定係盡我哋嗰個所能，嚟確保同類事件盡量唔好發生，亦都要從各方面去做。但係有啲事情如果要出現，又喺啲我哋不能控制嘅因素之下，亦都唔能夠咁樣去完全寫包單，大家都明白，但最重要係我哋做好所有防禦工作」。

　　去到最後，Jenny最擔心嘅其實都係Sammi嘅情緒，出軌嗰對男女會再做咩嘢老實講已經唔重要。