新任申訴專員趙慧賢話咁快就上任咗差唔多一個月，佢今日就舉行咗個傳媒茶聚，同行家們認識認識。之但係作為香港警察歷史上最高職級嘅女性警務人員，大家其實都對趙專員好熟悉啦！

叫慣Madam 改唔到口

　　Madam趙做開警隊，Jenny同行家們都好好奇應該點叫呢位新專員，因為大家都叫慣佢Madam呀嘛，有啲行家都唔係幾改到口添！經過一輪討論之後，都係叫返「專員」最保險！不過，大家更好奇嘅梗係佢對呢份新工有咩感受，同埋同以前有咩唔同啦！

　　趙專員就話，呢兩份工其實當中有類同亦都有唔同，類同嘅係兩者都係服務市民，自己嘅心智同價值觀亦都係Keep住係有正義感、獨立、無畏無私咁工作；至於有咩唔同咗，佢就話以前就管開3萬人，尤其是以前係做「副處長（管理）」，做好多都係管理工作，但係而家就淨係需要管120人左右，但工作嘅範疇就大咗好多，因為好多部門嘅投訴都關申訴專員公署事！

Nice過 Madam Man好多!

　　佢仲話，自己喺警隊36年嘅工作都係公共服務嘅一種，以前做嘅嘢同而家接觸嘅投訴都好相似，所以相信過往經驗對而家嘅工作會有幫助。唔知點解，Jenny總係覺得趙專員嘅說話、Background都咁熟悉嘅……咪就係好似呢排大台某套熱播劇集入面由影后惠英紅飾演嘅Madam Man？嗱!今日係趙專員第一次轉新工後見傳媒，所以全程都係好nice咁同大家吹水，有問必答， Jenny聽唔少人話Madam Man係影射緊趙專員，就咁睇Jenny就覺得性格唔太似喇!至於日後到底會點呢？大家拭目以待啦～

大家覺得趙專員有冇Madam Man feel?