「暴力、好暴力、勁暴力」「譴責、強力譴責、嚴厲譴責」呢兩、三日大家都聽唔少，Jenny都開始識得背喇！警方已經做嘢，搜捕行動已經開始，示威者衝得入立法會，一早預咗負上刑責。玻璃已爆、區徽已黑都係不爭事實。

被示威者衝擊後的會議廳。

解決問題定解決提出問題嘅人？

　　但其實Jenny認為，有三名示威者「以死相諫」，希望政府聽市民聲音，係更令人心痛嘅事。立法會裝修用錢可以重修，人命多多錢都買唔返！究竟係咩嘢令到年輕人視死如歸，押上前途、性命都在所不惜呢？

　　所以問題就係各方大罵暴力，厲聲譴責，再將一干人等拉晒入監倉之後，係唔係就等如所有嘢都完呢？一定唔係囉！深層次矛盾唔係一時三刻可以解決，但當權者都冇可以咩都唔做！我地係要解決問題，而唔係解決提出問題嘅人！

「嚴厲譴責!」之後呢?

　　Jenny覺得社聯行政總裁蔡海偉同科大校長史維講得好啱！蔡生在facebook出Po點出一個重點：「毫無疑問，他們的行動手法值得商榷，作為成年人我們沒有理由視而不見，或浪漫化他們的行為。但他們熱愛香港的心令人動容，這是任何一個愛香港的人都不能無動於衷的。」至於史維當然都對衝擊立法感到擔憂及痛心，不過喺學校內部電郵入面話：「社會各界有必要討論今次問題的根源，並持有開放及可商議的態度（open and approachable attitude）去直接溝通，若只是不斷重申同一聲明或持續的對立只會令社會更加分化，並非有利香港，香港最終只會成為輸家（Hong Kong will be the ultimate loser）。」

「成年人」宜放下身段聆聽

　　其實好多示威者都循唔同渠道公開講過，幾次和平遊行同集會之後，政府對巿民的訴求，仍然置若罔聞，令佢地好絕望，最後有一啲人就決定盡地一煲，用激進方法去表達，結果衝突不斷升級。或者一切一切都係因為年輕人真係好想有人放下身段去聆聽一下佢地嘅聲音，而唔係高高在上，一副「我係你阿媽」嘅嘴臉，上晝應承聽各方意見，下晝對家想傾兩句，反映後生仔意見，就話好忙唔得閒。

　　呢個時候Jenny就諗起一個都幾耐之前嘅公益廣告「每日暫停十分鐘，聽聽少年心底夢」，大家可以上Youtube Search下。各位「成年人」，用心聆聽其實唔難！