電影《2046》有一個對聖誕節很傳神的比喻：在開往「2046」列車乘客指南，「1224」和「1225」屬於特別寒冷的地區，除了使用車上的禦寒設施，乘客必須找另一個人擁抱。今個聖誕節，網上流傳一個麻甩佬的故事，他雖然沒有擁抱別人，但他的一個細微的舉動，就已經能夠送暖。

　　聖誕節期間，大家在網上除了分享歡樂和空虛外，更瘋傳下列事件：

　　「又係早餐，又係搭枱。

　　本來得一個十分麻甩嘅麻甩佬含住牙簽在嘆奶茶。

　　我叫咗個B餐之後，一個啊伯同一個十四、五歲少年坐低。佢哋好細聲咁討論邊個餐平啲，留啲錢今晚可以蒸條魚同啊媽一齊慶祝聖誕。睇完價錢後，啊伯話佢都係唔食，叫個少年自己食個A餐。通粉到咗，少年問伙計攞個碗仔，堅持分一半畀啊爸。伙計有點眼望望。跟住麻甩佬起身走咗。

　　當時我心諗：如果我請佢哋食個早餐會唔會好唐突？

　　然後，有個伙計放低另一個A餐，細聲話，頭先走咗果位先生幫佢哋叫嘅，單已埋。

　　佢哋好突然，然後啊伯笑住食，一路話: 咁好人咁好人...

　　麻甩佬，你好嘢！

　　聖誕快樂！」

　　網友們紛紛大讚麻甩佬「仗義每多屠狗輩」、「型」、「更帥氣」等。網上為了延續這份暖意，更發起善心行為分享行動，把幫人和被人幫的經歷和其他人分享。

　　兩度懷孕的「Maow Maow Helen」憶起「坐公共交通工具都甚少人讓座，其中一次經典事例是，坐長途巴士時，排在我後面的OL，上車後搶前走，坐了最後一個位。一個地盤工友看不過眼，讓座給我」；當「n@ts」搭巴士回家時，見到個後生仔八達通無錢，他就拿出一張一百蚊紙，問車上的人可否幫他唱散，突然有個三十幾歲的男人遞張八達通畀佢，更對後生仔說：「以後你幫返人就得」。

　　當「Wilczak」見工，過緊馬路的時候，突然落豪雨，但他並沒有帶遮，在旁的女學生就用一把不夠兩人用的縮骨遮遮他，更遮到他到有瓦遮頭的地方。

　　「佛祖保佑」講述一次和朋友食午餐的經歷：他們見到一個執紙皮的伯伯，腳上只穿著一對用紙皮做的拖鞋，他的朋友看到便立即走到附近的一間雜物舖買一對拖鞋，送給伯伯，在伯伯未來得及反應的時候，就立刻離開。

　　然而，除了令人感動的小故事之外，「明日晴」就分享一個沒有善心的故事，她曾在港鐵入閘後，才發現外套掉在閘外，當時站內有好多人，但卻沒有人提醒她，最後她只好出閘拿回外套。

　　　她認為「香港人是因為怕面懵、怕樣衰、怕尷尬，而害怕做善事」；「貨運車神」則認為「其實幫人真係唔難，只是睇你有無心同勇氣踏出第一步」。