一年一度嘅馬拉松今個星期截止公眾報名，相信有興趣參賽嘅朋友已經入表申請。近年，身邊有好多朋友都愛上跑步，不論男女，經常穿上一身full gear嘅運動裝束，自拍，然後上載到IG、Facebook，向一眾好友展示自己sporty一面。

　　當中我留意到有部分人有一個習慣，就係由跑鞋、短襪、緊身褲、排汗衫、運動手錶以至用嚟記錄跑步速度嘅手機app，佢哋都只會購買及穿著同一運動品牌嘅產品。有一刻，我甚至以為佢哋係某品牌嘅代言人，享受緊產品贊助。究竟點解佢哋會咁忠心？以下嘗試引用一個例子解釋。

　　上屆馬拉松，主辦單位轉咗同另一間運動品牌合作，除咗普遍參賽者都認為戰衣比歷屆靚之外，其實呢個品牌喺賽事前期 (pre-event) 同賽事之後 (post-event) 同參加者嘅互動亦可算係歷屆之冠。

　　比賽前幾個月，呢個品牌將多間門市打造成一眾跑手嘅訓練基地，提供比賽路線圖、訓練貼士同駐場教練，實用之餘亦借以增加比賽氣氛。就算以往只係志在參與嘅朋友都可能會被濃厚嘅氣氛感染，積極備戰之餘，亦為自己添置更多裝備。

　　而上屆賽事其中一段插曲就係出現戰衣尺寸唔啱嘅情況 (即跑手只能領取比原本要求大一個碼嘅大會tee)，所以收到唔少投訴。未知品牌係咪知恥近乎勇，今屆佢哋除咗分開男女裝設計，亦特別喺賽事報名期間，喺門市推出試衫服務，吸引一班target audience去各間門市試好尺寸先報名。

　　上屆賽事完結之後，該品牌提供燙字服務，免費將參賽者嘅名同完成時間燙印喺大會tee上面，成功令門市喺比賽完結之後嘅「淡季」出現人龍。

　　如果能夠成功鼓勵多啲人做運動，亦即多咗人有機會購買運動用品，所以呢個品牌近年積極喺世界各地建立佢哋嘅跑步社群，定期舉辦跑步訓練，開放畀所有人免費參與。訓練期間，多個「陪跑員」同你一齊跑，畀意見你、鼓勵你，慢慢就儲落一班跑友fans。每隔一段時間推出一啲跑友優惠，「exclusive and limited」嘅廣告字句更會令人覺得「唔買唔抵」。

　　要成功令消費者死心塌地咁忠於一個品牌，唔可以只靠硬sell產品「有幾好」，同消費者慢慢建立關係更為重要。就好似你想認識一個新朋友，你要一步一步令佢信任你，慢慢累積好感。當你成功吸引到第一班fans，令佢哋漸漸成為你嘅「民間代言人」，自然可以幫你一層一層咁將品牌推廣出去。