近日，「lunch time自己一個人食飯就係怪人」再次成為熱門辯論題目。

　　正方嘅朋友覺得，喺公司裏面唔合群、無朋友嘅同事先會自己一個人食lunch，仲話嗰啲人相當有嫌疑；反方嘅朋友就話小學雞先要人陪食lunch，間唔中「獨食」一下其實仲開心。

　　自己一個食lunch呢個topic其實無必要討論，亦無得討論，因為呢個純粹係個人取向。有人覺得一大班人去飲茶吹水先叫relax，但有啲人就寧願自己一個人去食一蘭，對住三幅牆玩電話先叫真正休息，並無分對與錯。

　　值得討論嘅，反而係一口咬定「一個食lunch就係怪人」嘅心態。

　　「一定係佢個人古怪，畀人排斥，所以無人肯同佢食啦。」

　　「我估佢喺度扮高竇，唔想同我哋埋堆。」

　　「而家老細咁睇佢，上晒位啦，仲駛咩同我哋食茶記呀。」

　　好多時我哋會單憑first impression，單憑別人口中嘅傳言對某人作出判斷。就算你未曾同嗰個人講過一句說話、未曾同佢合作過任何project，從佢嘅外表、從其他同事繪形繪聲嘅描述，我哋對某啲人已經心存偏見。之後佢哋再做咩行為，我哋都唔會再覺順眼。話人哋一個人食飯奇怪，有時只不過係喺佢哋身上多加一條「罪名」，合理化我哋對佢嘅偏見。

　　自己一個人食lunch根本唔係問題，問題係你點睇呢個同事。

　　你可以因為同事無上進心、做嘢無交帶、英文唔好、返工成日遲到而覺得佢有問題。但如果只因佢選擇自己一個人食lunch，而扣佢印象分，咁做未免顯得你質素太低。

　　初入職場，好多人希望盡量埋堆，擴大自己network，喺同事口中獲得更多有用資訊。但工作耐咗，「堆」有時仍然需要埋，但真係要好啱傾，或好有必要先會花力氣去埋，因為埋堆有時仲攰過OT。工作再耐啲，你會更有勇氣去選擇唔埋堆，因為你知道你係靠實力、靠工作表現去證明自己，而唔係靠外表、靠識多幾多個同事、靠有幾多人同你食lunch而去彰顯你嘅價值。

　　當你覺得自己一個人食lunch唔係問題，自然唔會覺得其他人一個人食飯係問題。呢個係你職場成長印記之一。當你繼續喺職場闖蕩，你會繼續明白更多，包括下一階段嘅領悟：接受到公司只有同事，並無朋友。