當公司轉型或者擴展嘅時候，title會因為改嚟改去而變得模糊，經常令同事混亂之餘，亦令高層們出現好多不必要嘅鬥爭。

　　當公司scale慢慢變得愈來愈大，架構就會愈來愈複雜，尤其係一啲公司剛剛由小企／中企步向中企／大企，佢哋嘅情況更為雜亂，因為公司對呢啲title 同org chart（organizational chart 企業架構）冇乜概念，所以當公司轉型或者擴展嘅時候，新高層加入、老臣子升職、阿哥阿姐級人馬要管埋另一個dept時，title會因為改嚟改去而變得模糊，經常令同事混亂之餘，亦令高層們出現好多不必要嘅鬥爭。

　　見過一間中小企公司，一位dept head 本身嘅title係「Manager」，後來老細「錯手」為dept請多咗個新Manager，當新同事返工時老細先發現問題所在，所以立即將舊嘅Manager改為「Head of」以平息紛爭。當然，title 多多、經常轉花款，某陣時其實係形同虛設，係老細對同事玩嘅文字「偽」術，而喺org chart角度嚟講，兩位Manager根本係一樣高低。咁多title，大家應該點去分高低呢？

CEO vs Managing Director (MD) 

　　CEO同MD邊一個高級啲呢個問題，坊間有好多唔同嘅說法。有人話CEO高級過MD，因為CEO一定有股份，但MD就未必有；亦有人話CEO 同MD 其實係同職級，只不過唔同國家對呢個職位有唔同嘅稱號，英國公司用MD，日本公司用RD（Representative Director）等等；亦有人話，呢個職級嘅稱號，好多時都係基於公司創辦人嘅喜好而定，並無特別原因或典故。

Managing Director (MD) vs General Manager (GM)

　　好多公司都一定有CEO／MD，但就未必一定有GM，因為MD都可以同時處理GM嘅工作。好多公司都未能分清MD同GM嘅工作內容，MD專責處理公司所有策略性、方針嘅事情，例如來年方針、annual budget、business direction、策略性伙伴等等，主要對外。而GM就主要對內，亦係「所有Manager嘅Manager」，處理各部門嘅 P&L（Profit & Loss）同 Sales and Marketing 嘅事情，亦會oversee 部門間嘅 daily operation，而GM 亦要report to MD，所以MD 嘅職級係大過GM。

Director vs Head of 

　　Director 同 Head of 邊個高級啲，其實都係眾說紛紜。其中一個說法較為合理（好似），Director係略為高級少少，Head of 主要管理一個小組內嘅同事，而Director 就會管理不同小組嘅 Lead／Head。感覺上Head of 有少少似Manager，所以係under Director。

　　而家好多老細都喜歡自創古靈精怪嘅title去「滿足」公司需要，不同公司都有自己一套改名習慣同傳統，好多時都係約定俗成，並冇特別原因。所以如果以後遇到職級高低嘅疑問，其實簡單一點，只要望一望自己嘅人工，問題就會迎刃而解。