「價值」二字，看似係一個好簡單嘅詞語，但又有好多人未明當中意義。

　　股票市場經常出現大上大落，好多人因此損手爛腳，但同時間又會「時勢做英雄」。公司茶水姐姐興姐，又名小股神，近日就大有斬獲，同事見狀亦向興姐拜師學藝，lunch時更成立炒股「興」趣小組，由興姐做導師，帶領一眾股票初哥出征。

　　「XX公司股價由高位回落咗好多，其實現價已經係好抵，只要去到$25大家真係要大手入貨。」

　　「點解$25係好抵？」同事A問。

　　「因為之前佢係$50，跌近一半喎，仲唔係好抵。」

　　「咁點解唔係現價入貨，或者$35、$30，而係$25？」

　　興姐無再回答。

　　當然我唔係股票專家，但其實股票有時同職場／marketing都好相似。當一間公司剛剛上巿，或者冇乜人認識時，就好似初出茅廬嘅小薯，好少人會睇到佢嘅價值同潛力。日子耐咗，小薯嘅努力開始被人認同，發現呢位員工原來係「潛力股」，老細會評價呢個員工將來嘅價值，繼而開始投資喺呢位員工身上。但過咗一段時間，該員工已經「到價」，老細亦睇唔到佢將來嘅價值，該員工慢慢變成公司嘅「old seafood」，老細／股民就會對呢隻「股票」失去興趣。

　　「價值」係隨著唔同時段或時勢而改變。70、80年代嘅菠蘿包賣幾毫子一個，而今日大約賣$8-10左右，如果因為之前$50變成而家嘅$25，就等於好平的話，咁今日係唔應該再出菠蘿包。其實價值永遠都不停地變，菠蘿包也好，股票也好，人亦都係一樣。每日都係一個新故事，要重新計算同定義。

　　同股價一樣，以前嘅價值只能作參考，唔一定代表將來嘅價值。以前經濟同社會比較簡單，職場上，「勤力」必定係員工嘅核心價值，係成功嘅關鍵，只要你肯做，要上位要賺錢相對地易。但90年代經濟起飛，加上科技進步飛快，經濟進入咗「2.0」世代，勤力已經唔再係核心價值，而係「必需品」，懂得善用新科技先係關鍵。到咗今日，全球經濟受疫情困擾，當疫情完結之時，又會進入「3.0」世代，「懂得善用科技」同「勤力」一樣再唔係核心價值，會變成必需品。當年你嘅價值在於你勤力，但去到今時今日，勤力已經「貶值」、「回報率」變得相當低。

　　好多人睇價值都有自己一套方法，但千萬唔好用自己眼中嘅價值，去評價自己呢隻「股票」。職場也好，股場也好，你覺得自己值錢係冇意思，要令巿場覺得你值錢先係重點。唔好再同人講「當年我點點點」，要同人講「我將來可以點點點」，讓老細主動投資喺你身上。而下一個關鍵又係乜？自己喺3.0世代嘅價值又係乜？如果再唔起步，就好快被淘汰。

　　自己／股票值幾多錢，永遠都唔係由自己去決定。但價值永遠都係由自己去創造，之後再由別人去肯定。