上次講解過如果新手要炒牛熊證要做好咩準備功夫，唔知大家覺得有無用呢？呢次我哋進階小小，講下落場時候應該留意啲咩，炒恒指牛熊又應該參考啲咩數據指標，甚至應該點樣培養好對大市嘅觸覺。不過謹記一點，牛熊證特點就係以小博大，切忌賭身家咁落場啦！

（Shutterstock圖片） 

開市前要睇晒美股「黑期」走勢，ADR升跌都有影響！

 （Shutterstock圖片） 

　　市場瞬息萬變，如果真係要落場，第一件事就係要知道個市當日炒緊乜，而美國經濟、國債、黃金、甚至比特幣都會影響到環球股市氣氛，所以隔晚美股走勢係一個明顯參考數據，對第二日港股有明顯指導性作用；另外，「黑期」更係開市前瞻！因為「黑期」早上走勢係反映緊投資者對港股開市睇法，如果大幅抽升，恒指都好大機會跟住高開。

　　其次，大市升得多與少，就要睇ADR嘅表現啦！因為要留意重磅股ADR對比起港股有無重大升幅，畢竟大市向上都要靠幾隻大藍籌推動；開市前一個鐘就要留意日經、首爾指數、台北加權平均嘅表現，而開市後就要望實A股走勢，好多時候Ａ股同港股表現有掛鈎情況，Ａ股升港股好多時候都跟住抽高。簡單嚟講就係要一眼關七啦！

開市點數背後解讀，無波幅情願唔落場

 （Shutterstock圖片） 

　　其實開市點數開幾點，都解讀緊投資者對大市嘅睇法，今次會用列舉方式同大家講解下（撇除有特殊情況出現）：

1.高開／低開數十點，意味投資者未睇透大市，甚至睇淡大市，所以未敢大手落場；好多時候恒指高開數十點後就會立即回吐，呢個時候開市即買熊就值博率相當高，反之亦然。不過仍要參考環球股市氣氛，以今日為例，不論亞洲定美國股市都係數十點上落，股市氣氛淡薄，恒指高開48點後都係窄幅上落為主，呢種悶市確實唔炒好過炒。

2.高開／低開數百點，意味投資者有明顯看好／看淡大市，但由於已經高開／低開幾百點，再入場嘅相對風險較高，而且多數都係由重磅股急升／跌推動，所以想開市後入場就要留意其他藍籌走勢，不過可以再炒機會不大，所以唔建議再入場；亦有人喜歡「反手炒」，即牛市開熊博佢跌，熊市開牛博佢升，不過經驗話畀大家聽咁樣同買大細無分別，炒牛熊應該順勢而行，而「反手炒」技術要求好高，特別係心理質素。

3.高開／低開1至200點左右，其實呢種市亦相當好炒，因為波幅擴大嘅機率相當高，但須要留意大市氣氛，所謂「氣氛」即係有無消息炒緊，例如北水南下、國家隊入場、加息等因素，否則就算高開／低開逾百點都容易造成「好淡雙殺」局面，得不償失。

炒市要睇分鐘圖，陰陽燭、MA線、RSI、MACD四招夠用

 （Shutterstock圖片） 

　　由於炒即市係講究反應，所以太多技術分析只係令自己思考太多，落手太慢，慣用四種技術分析就係睇分鐘圖嘅陰陽燭、MA線、RSI、MACD。

　　陰陽燭主要係負責「數浪」，例如大市升幅分鐘圖，已經出現三至四浪，再抽升機會不大；MA線主要睇大市氣氛，以10天線為主，跌穿20線就已經可以睇淡，並可以當作一個買入／賣出信號；而MA線更要配合埋MACD，當兩者同樣出現「交叉」，令到買入／賣出信號更加明顯；RSI係睇大市氣氛會唔會過熱，同樣具有買賣信號意味。

　　不過，要留意嘅係，以上技術分析都有滯後問題，要學識點良好運用，就要留意住我地嘅專欄啦！

撰文：李皆穎