近來好多人都開始進入加密貨幣市場，但原來好多人都唔太清楚區塊鏈係乜嘢嚟！而世界上都好多款「鏈」係市面，唔同鏈又唔可以互相交易，睇少陣都好容易出事！而呢堆鏈又同「掘礦」有關？乜係「燃料費」？媽，好亂啊！今集經濟不停學同你搞清楚呢堆概念，等你入場得心應手！

加密貨幣1.0-比特幣

(Shutterstock圖片)

　　比特幣誕生係因為發明人「中本聰」想創立一種「去中心化」交易方式，即唔需要銀行或者中間人，人與人之間可以直接互相交易之餘，交易紀錄都全球人都接收到又確認到，所以發明一種「區塊鏈」技術，簡單嚟講，區塊鏈係一公開嘅數簿，入面每一個區塊記載住每個人交易紀錄，任何人都可以查看，而區塊與區塊之間由加密算式建立連接，所以無法被修改或者變換，只要你個區塊修改過，同前後區塊數值唔一樣，交易都不會成功。

　　至於礦工，其實就係將你交易紀錄Pack上區塊鏈，再收取獎勵，比特幣起初為鼓勵礦工加入，由0至21萬區塊，每生成一個區塊，礦工獲得50粒比特幣作獎勵；每達成新嘅21萬個區塊，礦工收益減半。去到693萬區塊開始，礦工收益獎勵為零，唔會再有新比特幣流入市場，礦工到時只會收到來自比特幣轉帳交易費，所以最終只會有2100萬比特幣流入市面。

　　比特幣最偉大地方，就係將「區塊鏈」技術帶入金融世界，顛覆金融行業「中間人」嘅角色，對銀行、交易中心、結算中心有威脅性影響，甚至有可能取代「法定貨幣」嘅可能性，所以不論中國定美國，都十分關注比特幣發展。

加密貨幣2.0-以太幣

(Shutterstock圖片)

　　加密貨幣發展去到2014年發生重大變化，因程式設計師維塔利克·布特林（人稱V神）受比特幣啟發，發布新一代加密平台以太坊（Ethereum），以太坊特色就係擁有去中心化嘅開源智慧型合約功能，以及公共區塊鏈平台，源代碼完全公開，假如你想發行一種新幣，可以選擇以太坊平台，並使用佢嘅區塊鏈進行交易。

　　而對比起比特幣嘅有限供應，以太幣本身供應量係無限，每年為1800萬粒，目前市場流通數目為1.18億左右；隨後以太幣進行升級，加入銷毀機制，暫時一年銷毀約300萬粒，令期通脹率由 4% 降低至 2.1%。以太幣同比特幣挖礦不同地方係，以太幣以「燃料費」（GasFee）為中心，礦工為買賣交易作認證並搬上區塊鏈，同時會向交易的主動方收取燃料費作為報酬，而燃料費多少就係睇當時交易量的高低，假如流量高的話，就需要支付更多療費作為交易，而以太幣則作為以太坊平台上支付燃料費的唯一貨幣啦！

加密貨幣3.0-不同區塊鏈的誕生

(Shutterstock圖片)

　　以太坊平台一推出就大受歡迎，唔少新幣都採用呢個呢個平台發行，包括近來城中熱話嘅柴犬幣（Shib）啦！不過，正正因為以太坊合約多人採用，而以太坊區塊鏈每秒只可處理數十單交易，根本不足以應付市場需求。正因為咁，市場開始出現不同嘅區塊鏈平台，例如幣安旗下嘅「幣安鏈」，後起之秀Cardano區塊鏈、Polygon區塊鏈，以及有「以太坊殺手」之稱嘅Solana，呢類新款區塊鏈交易費更平、每秒處理宗數更大，可達萬宗，所以大家都估緊究竟呢班後起之秀可唔可以取代以太坊。

　　正因為唔同鏈本身所行嘅合約不一樣，投資者係買入加密貨幣時候要留意清除兩點，第一就係自己個加密錢包接唔接受該種區塊鏈，假如唔接受就會有機會將持有貨幣「射落海」嘅情況；第二就係不同區塊鏈之間不可以互相交易，所以進行買賣時候用返一個多人採用嘅智能合約，唔好貪平就用一啲小眾區塊鏈，最後有入無出就無謂啦！

撰文:李皆穎