不少朋友對從事金融界人士有根深蒂固的印象，認為在金錢世界打滾的一族，認識都是上市公司老闆、大孖沙，當中有富有貴、非富則貴、甚至富而不貴，肯定嘗盡天下美食。然而，愛面子的老闆們、尤其出公司數的上市公司，股東錢請客食飯，又豈會失禮。可是，貴就是肯定的了，至於好吃與否，又是另一回事，三百大元一件切開只有七小件的西班牙黑毛豬叉燒、三百元一隻蒜香雞，值唔值？見仁見智。

　　正如好揀唔揀，係要揀母親節正日跟其他考順仔女逼兩個半鐘飲餐茶、限時限刻埋單、兼限點套餐形同被劏，值唔值？倒不如問自己，本應平日做的事，為甚麼要揀在同一日爭崩頭？

　　內地土豪新發財當中，不少仍以為最貴就是最好，問到真正懂得吃的，絕不會百分百認同。老實說，根據個人和一些朋友的親身經驗，即使是米芝蓮級數的星級食肆，部分不知是否盛名所累，大夥傳媒人獲邀試食，出品總不會失禮，及後再帶家人朋友低調光顧，卻每每被食物質素或服務水平弄得乘興而去、敗興而回。如今已學精，未親自再三驗證過的食肆，已不敢再向友儕推介。