別以為in成份工便「過咗海係神仙」，可別忘了還有個Probation（試用期）要過。新嚟新豬肉，返新工首一星期尤其關鍵，以後「食粥食飯」很大程度就靠這幾天的表現。新仔不易做——表現圓滑或被指「世界仔」；太直率又分分鐘被斥「唔識做」……

新仔識do 7件「小事」

1、人肉搜尋Key Persons

　　老闆和直屬上司固然唔少得，另外秘書、HR、IT部兄弟姊妹，以至茶水阿姐，都應該去打聲招呼，廣結善緣，有備無患。

2、「索」取潛規則

　　辦公室內，明文規定守則固然要遵守，而不成文的潛規則更不容忽視，皆因既深不見底，亦變幻莫測。最基本的包括︰誰受歡迎、誰乞人憎；邊個玩得、邊個唔得罪得；以及有無人洗杯、Dress code如何、有沒有「飯腳」等。

3、執枱

　　新同事給人的第一印象，往往從他們的工作枱而來。第一日返工要執執個位是常識吧！（阿媽沒有跟返工）除了執乾淨之外，還有一系列的設定，如張羅文具、駁電話/ 列印機，以及找插蘇拖板等。

4、預備「To-do-list」

　　初返工一般是行行企企，但亦不代表「新豬肉」可以鬆懈——最好利用這段時間做個「To-do-list」，慎防真正上戰場時甩甩漏漏，同時或可賺個老闆好印象。

5、熟習地形

　　初來步到，其中一項重要任務是——認路。附近的餐廳（最近、最好食）、銀行、便利店、麵包舖、飯堂、地鐵站、巴士站等，一定要知！

6、更新社交狀態

　　社交平台如facebook等，最好更新一下工作現況，也許能發掘出意想不到的機遇。但切勿「狼死」亂add同事，add與唔add之間，還有很大空間。

7、埋堆

　　說到底，最重要最重要的是——物色幾個可以信賴的夥伴。識人好過識做嘢，有幾個「知椗」的新朋友，大部分上述提到的都輕易搞定。

　　事實上，職場上並沒有甚麼可以一勞永逸。見步行步之餘，凡事做好準備，並不斷提升，方能抓住機遇！

　　原文刊載於ctgoodjobs.hk