「我以前份工好好架」、「人地以前返工都唔係咁嘅」……公司最近來了新同事M，開口埋口就「以前份工」。我不明所以，既然「以前份工」如此只應天上有，閣下紆尊降貴跳槽過來，幹嘛？

　　「下，呢度Pantry無咖啡機架？以前公司就有3部。」M首天上班，就這樣向我「乍型」。

　　雖然我都好想有……但咖啡機這東西，見到就有，見唔到就無，難道問2句就會由無變有？嚴守辦公室求生守則，我禮貌答︰「公司空間有限，所以啲咖啡機我地託孤咗畀樓下Starbucks。」

　　「呢度啲位咁細，我以前公司都唔會咁窄。」「呢度無得彈性上班？我以前有得自己揀。」「你地唔覺得呢度冷氣好凍咩？我以前公司好舒服架。」

　　夠喇，真是奄悶到想死。「好難頂噢。」我衝口而出，幸而「我係話我自己」這句尚未說出口。M覓得知音一般神態自若，我繼續︰「你嚟之前，我公司都無同事嫌三嫌四、咩都篤眼篤鼻。」 

　　如果見工面試最忌唱衰ex老闆或ex上司的話，那麼返新工就唔該千祈唔好過度膜拜前度。小弟納悶，怎麼可能有人夠膽肆無忌憚地在現任面前大讚前度的好？我從來不認為，這種情況下，老闆會比老婆（或老公）大方厚道多少。

　　「其實，如果我係你，以前份工咁好，就打死都唔走。」當然沒有忘記， M來見工的時候，我是面試官之一，亦循例問過他辭職原因。當時，他官腔答「想挑戰自己」之類。有點後悔當時宅心仁厚放過他，隨即想想M的過人之處，不然我是絕對不會請他回來「挑戰（我）自己」的。

　　M當下不懂反應，我唯有打圓場︰「你記唔記得當初點解想嚟做？我地呢度都有好多好嘢，你不如都畀心機發掘下。」

　　總之，閣下以前份工，現已變成人地份工；至於你而家份工，曾幾何時亦是人地以前份工；至於日後，這到底仍然是你份工，還是變成以前份工，得看施主造化。