職場上經常要交際應酬，有時不幸遇著「長氣」客戶、合作夥伴，甚至老細，明明好想走先但又怕尷尬、驚得失對方，唔敢打斷，結果搞到自己硬食呆坐成粒鐘，內心非常焦躁，工作進度嚴重落後之餘，表面上仲要扮到好有興趣、洗耳恭聽咁樣，真係諗起都慘情。

　　其實只要高明地結束對話，就可以走先兼能同時保持雙方良好關係。以下有幾個實用招式：

1/ 轉移視線

　　轉移對方注意力，兼且提供一啲好處、幫助，可以減輕結束對話時產生嘅尷尬同負面感覺。例如打算離開時講：「啱啱提到嘅資料，我返去之後send畀你。」、「關於你嘅問題，我同事好有研究，或者我請佢同你講解。」

2/ 身體語言暗示法

　　對話過程中嘅小動作會引起對方注意，例如望錶、拎起枱上文件，配合呢啲動作加上解釋，就可以先發制人，同時令大家都好落台。例如望錶之後話：「唔好意思，我要睇住時間，因為20分鐘後仲有個會要開。」或者拎起枱上文件，對話期間時不時瞄一瞄，然後話：「份文件有啲嘢要執，或者我快啲返去改完畀你睇？」然後順勢起身「撇s」。

3/ 預告結束

　　如果會面後有其他工作或行程，不妨喺對話中（不經意）提及，令對方有心理準備並且注意時間。例如主動問對方：「完咗之後你使唔使去其他地方？/ 你有無其他嘢做呀？」如果對方答：

　　A.「我之後要去XXX / 要去開會 / 要返公司。」

　　你就可以順理成章話：「咁我地儘快傾完，唔好阻你咁多時間。」

　　B.「無喎。」

　　你就可以提到自己之後嘅行程：「我之後仲要返公司搞埋啲手尾。」

4/ 直言不諱

　　有時對方講到眉飛色舞，可能完全無視你各種明示、暗示，甚至忘記時間。你可以直接表達：「好多謝你今日抽時間同我地見面，但我地仲有好多工作要跟進，所以唔好意思真係要走先，或者下次再傾。」以工作為由離開，對方多數會理解，不必擔心失禮。