踏入12月，感覺聖誕節快將來臨。又係時候準備聖誕節派對美食餐單的時候。

　　韋太最愛親自製作派對美食，連配搭的醬汁都要自家製作才覺得美味。

　　之前開大食會，有朋友的丈夫是在大酒家工作廿多年，她說她丈夫經常在家製作大量沙嗲醬，分好一包包放入冰格，做餸時預先解凍，即時可以享用。

　　她送了一小樽給我回家試食，我試過加一小包入去炒雞肉意粉，炒出來的意粉味道剛剛好，連大少爺都話好味。我覺得那沙嗲醬的味道，好似在我童年時街邊檔賣咖喱魚蛋蘸的醬汁一樣，但可惜朋友說他的食譜不便公開及教授，我只能大約估計入面的材料，去配搭出近似的味道。

　　這個醬汁，經試味及重新調較後，味道都十分惹味，配搭派對美食或意粉，保證朋友食過一定讚好。

烹調時間:  30分鐘

份量:　1000 克

材料:

材料 (A):

　　菜油 4湯匙、乾蔥茸 3湯匙、蒜茸 3湯匙、薑茸 3湯匙、沙茶醬 3湯匙、咖喱醬 2湯匙

材料 (B):

　　黃薑粉 1湯匙、沙薑粉 2湯匙、五香粉 1湯匙、辣椒粉 2茶匙、甜椒粉 1茶匙、咖哩粉 1茶匙、孜然粉 1茶匙、豆蔻粉 1茶匙、香茅粉 1茶匙

材料 (C) :

　　花生醬 100克(可用粗粒花生醬，就唔使加入花生碎)、牛奶 250毫升、清水 100毫升、椰漿 200毫升、黃砂糖 2茶匙、幼鹽 1/2茶匙、生抽 1湯匙、毫油 1茶匙、花生碎 50克 (已炒香)

做法:

　　1. 預先將材料A、B、C準備好。

　　2. 燒熱鑊落4湯匙油，將材料A)的蒜茸、薑茸及乾蔥茸爆香，然後加入沙茶醬及咖喱醬炒勻，最後加入材料B) 炒勻。

　　3. 將材料C) 預先拌勻，加入煮至大滾，將爐火改為細火煮10-15分鐘即成。

小貼士:

　　做好的沙嗲醬，不是即時全部食用，可以將沙嗲醬用保鮮袋分開細小袋盛好，放入冰格冷藏，食時預早改放雪櫃下層解凍，便可使用。