回憶起童年時住公屋的時候，每晚大約 6-7點鐘左右，就會聽到走廊傳來小販的叫賣聲 … 白糖糕、西米糕 …. 於是我就好開心走到鐵閘門口叫停賣西米糕的嬸嬸，幫她買西米糕吃。手上拿到西米糕總會覺得油淋淋，但西米晶瑩剔透，入面又見到黑黑的豆沙餡，一啖吃下去即時已感覺到西米糕的軟霖及彈牙的口感。

　　時至今天，相信大家無可能會在走廊聽到有小販叫賣的聲音，又或者很難會在街上找到售賣西米糕的店舖 ….. 想懷緬童年時開心的時刻感覺? 就要靠自己親手做啦! 食唔晒可以用保鮮盒盛好，放入雪櫃冷藏，食時叮番熱回軟，口感較佳。做好放在雪櫃做飯後甜品一流 !

份量: 4件

製作時間: 1 小時

材料： (約6件)

　　西米 50 克、馬蹄粉 2湯匙、清水 3湯匙、砂糖 30克、菜油 1/2湯匙、紅豆茸 120克

用具: 

　　蛋撻模或錫紙杯

做法：

　　1. 用鍋燒熱1量杯清水(材料份量以外)，水滾放入西米煲5 -7分鐘，然後關掉爐火，密蓋焗15分鐘至西米完全呈透明狀，倒出西米隔去水份， 用開水冲洗至涼透， 瀝乾水份備用。

　　2. 馬蹄粉加清水拌勻，過濾雜質後，加入西米內，另再將砂糖及菜油加入拌勻。

　　3. 模具要預先掃上油，將西米糊倒入約七成滿，加入適量的紅豆茸，再加入餘下的三成西米糊。放入蒸籠內，大火蒸約8-10分鐘至透明即成。

　　4. 放涼一會脫模或改放雪櫃冷藏1-2小時，食時用竹籤或牙籤將糕起出。

韋太小貼士 :

　　如果想西米焗完都係晶瑩剔透，一定係用以上蒸焗的方法，煲得太耐會較容易將西米煲至起膠狀就唔好食。