臨近歲晚每個家庭都會忙於準備賀年禮品，而主婦們都會費盡心思去安排團年飯或開年飯等等。雖然只係準備一兩餐應節飯菜，她們都會用心去煮，用心去安排，若然無兩手(菜色)準備，隨機應變，萬一買唔到預期的食材，都有後備菜色補上。

　　我每次去海鮮店吃海鮮，都會點一道避風塘瀨尿蝦，在海鮮店點的蝦當然係手掌大的，價錢當然昂貴。偶然行開街市，見到海鮮檔都有細隻及游水的瀨尿蝦，價錢非常之便宜，而且蝦還新鮮。所以便買些回來試下用家庭式的方法去做，由於無做走油動作，效果當然不及酒樓菜色，但都出得廳堂。

　　今次改用簡單的方法，不用加太多金銀蒜都做到避風塘的效果，團年飯買些來應節，一家人開開心心食餐團年飯，準備迎接猴年啦 ! 

烹煮時間: 15分鐘

份量: 2-3人

材料: 

　　瀨尿蝦   1斤

　　辣椒    1隻 (切粒)

　　蒜茸    1 個

　　麵包糠  2湯匙

調味料:

　　雞粉   1茶匙

　　鹽     1/2 茶匙

做法:

1. 瀨尿蝦洗淨，燒一鍋熱水將瀨尿蝦煮3-4分鐘至熟，沖水瀝乾。

2. 蒜茸去衣，切成茸，辣椒切粒。

3. 燒熱3湯匙油，爆香蒜茸及辣椒炒香，加入瀨尿蝦、調味料及加入1湯匙熱水炒片刻，然後加入麵包爆炒至乾身。

小貼士:

　　若想效果更理想，可以將蝦泡油代替用水煮。