平日大家的家庭菜色，相信甚少會選用鴨作為食材，除咗買燒鴨回來加料。

　　但其實間中改變一下，會有新鮮感。若果唔係，煮來煮去都係雞翼、豬扒或鹽焗雞。

　　急凍雞翼大家就經常食，今次選用急凍米鴨，細細隻，一餐過食完剛剛好。

　　而且又方便，之前打風季節，天文台預早提示大家颱風將會黃昏時段會掛8號風球，市民就匆忙到街市買餸，工人姐姐話連急凍雞翼都售清，她就好聰明，買咗一隻急凍米鴨回來，都可以煮到一碟出得廳堂的菜色。

　　所以，我都希望大家能夠嘗試多採用鴨來入饌，給自己及家人多幾道菜色品嚐。

香蔥燜米鴨

烹煮時間: 1小時

份量: 3-4人

材料: 

急凍米鴨    1隻 (約1500克) 

乾蔥頭      200 克 

蒜頭        4瓣

南乳        1磚 (約20克)

調味料:

冰糖        50克

生抽        2茶匙

老抽        2茶匙

幼鹽        1/4 茶匙

紹興酒      1湯匙

清水        400 -500 毫升

做法: 

1.米鴨解凍，清洗內臟後，瀝乾備用。

2.乾蔥頭及蒜頭去衣，切粒。

3.南乳醬連少許汁壓爛。

4.燒熱鍋/鑊落少許油，先將乾蔥頭及蒜頭爆香，然後加入南乳醬爆炒，加入100毫升清水將醬料拌勻及煮滾。

5.將米鴨背部放入鍋內煮5分鐘，然後反轉另一面，加入調味料及餘下清水煮滾。

6.蓋上鍋/鑊蓋，改慢火燜煮45-50分鐘，其間最好每隔15分鐘留意汁液的蒸發及20鐘後將鴨反轉另一面繼續燜煮。煮至鴨肉質霖身，用小刀容易插到入鴨髀內代表已霖。

7.將鴨放涼一會，斬件上碟。餘下汁液如太多，可只取一小部份，加入適量生粉水煮至杰身，淋在鴨上，即成。

韋太小貼士:

　　買南乳多數會到雜貨店買，經常煮餸的可以買一樽，煮時可以連同少許浸南乳的汁一同壓爛。