HAPPY NEW YEAR！到咗2018年，各位打工仔嚟緊有咩大計呢？據本人的八卦力統計，原來身邊好多同事都等緊1月1號呢日！因為佢地終於等到出雙糧、花紅呢一日！拎完唔知有冇嘅雙糧及瘦到食唔到肉嘅花紅之後呢？Get set, ready, GO!! 緊係跳槽啦！但公司有個出名小氣嘅經理，竟然因為一位同事堅持辭職，臨尾都要上演辦公室欺凌一幕，激到同事恨不得同佢黎個世界大戰！

　　先講講呢位同事嘅背景：同事同小氣經理差唔多時期入職，都叫做係小氣經理嘅開荒牛！做野永遠唔會甩拖，大家同佢合作都會好放心；公司有急事嘅話，同事都會幫手OT一齊搞掂佢；小氣經理旗下所有小薯，都係呢位同事幫手帶佢地上軌道添。係，雖然佢有時會偷懶（有得偷唔偷，嗰啲叫做忠心嘅返工狗，唔係一個正常嘅扮工人士），但對於公司業務及其他同事絕對無傷害！咁講真，chur 左7個鐘都要休息下架？總之一句講哂，「係一個可靠的同事」。

　　到左跳槽旺季，同事終於鼓起勇氣走向經理房向上司請辭。十五分鐘後，同事由經理房步出。知情嘅大家當然一窩蜂上前八卦一下！離開地獄本應係件好事，點解同事黑口黑面？

　　「點呀？佢有冇講咩？」

　　「佢真係好_ _囉！幫佢做咗野咁耐，而家竟然玩返我轉頭？」

　　「吓？咩事呀？」

　　「我仲有啲野下個月跟緊，咁我都提出幫佢做埋先，啫係一個月通知後做多兩星期，幫佢搞埋啲野先走。點知佢要我計足一個月last day，但我負責緊嘅野要做埋先俾走！而家啫係點呀？last day前做埋黎緊半個月啲野？幫你做埋下年全年啲野好唔好啊？」

　　「吓？真係好狗喎⋯⋯佢冇留你咩？」

　　「緊係有喇！傾左15分鐘，10分鐘都係留我，到咗尾5分鐘唔成功就反枱喇！佢唔只要我last day前做埋下半個月啲野，仲要我清假，提前last day啊！」

　　「嘩！好賤格喎！嘢就要做哂，但係咁迫你早啲走人。講真，幫你做野唔係問題，但你要出返糧比人囉！正常上司都好易話為，俾你做多幾日跟埋啲手尾先走啦！啲錢又唔係佢嘅，佢計到咁足擺明恰你啫！」 

　　真係聽到打工仔個個都無名起火！偏偏，打工仔就如事件主角一樣，幾嬲都好，為左封reference letter同reference check迫住要做！其實我地做細嘅，都係想好黎好去，雙方大家合作愉快就夠！何必咁樣挑戰人地底線？咁多位上司，記住！山水有相逢，你唔會永遠都係上司！