成日聽日人講：「返工遇到好同事係bonus！」係嘅，辦公室遇唔到小人已經好好彩，更何況遇到個同你啱傾、又會同你並肩講壞話嘅好同事，真係幾生修道！日復一日，同事變做好同事；好同事變做朋友！同事變做朋友？咁就出事喇！私事加上公事，真係亂過世界大戰！ 

　　公司有對年紀相約，係同一部門做嘢嘅孖妹，一個叫Lillian，另一個叫Tiffany。佢地形影不離到其他Department都知道呢對孖妹嘅存在；連上司安排工作都會交畀佢地二人跟進！始終，佢地係職場上真係做到「關係好，溝通多，辦事效率快及能力高！」所以，好多職場女同事都好羨慕呢對孖公仔可以搵到真·姐妹！而Lilian同Tiffany都想將佢哋嘅友誼昇華，所以決定一齊請假去旅行！唔使審，打得呢篇文佢哋一定係絕左交！就係二人回歸當日： 

　　「喂，Tiffany！玩咗咁多日開唔開心啊？有冇買手信先？」 

　　「仲手信？我直程同Lillian反左面！」

　　「吓？咩事啊？」 

　　「佢真係好自私囉！咁大家都唔識路，我用Google Map搵路時，佢淨係玩電話唔幫手都算；但佢自己又唔帶尿袋，全程插住我部尿袋搞到唔夠電搵路，仲要我一拎部電話出嚟就串我：『你叫我唔好玩，自己又玩？』我知你要向啲兵派軍糧，但我哋搵唔到路返酒店仲大鑊啊！你啲兵可唔可以即刻飛過嚟救你啊？」 

　　咁我哋作為同事，就梗係盡量講好說話令佢哋和解。但問題錯就錯在Lillian完全唔知Tiffany嬲咩，仲覺得佢周圍唱自己收兵，嬲起上嚟喺公事上處處為難Tiffany；而Tiffany就覺得Lillian除咗自私之外，仲要做錯唔認，一樣係公事上針鋒相對。最無辜嘅，就梗係我哋一班同事！有公事搵佢地時，佢地永遠將工作卸畀對方，最終要我地三催四請嘅情況下先收到貨，仲要難為我地聽盡二人嘅單單打打，真係完全影響辦公效率，阻人收工！　

　　不過，呢件事都有唯一一個好處，就係是非滿天飛嘅環境下，知道原來平時斯斯文文嘅Lillian又係一個港女娘娘，閒時最鍾意收兵。所以話，就算返工遇到好同事，千祈唔好好似呢對姐妹花咁將私事講比人知！始終，保留少少神秘感個人會吸引啲！