「香港，勝在有ICAC！」係咪睇見都有聲呢？係啊，我個腦都一直係度loop緊呢句說話，相信其他同事都係！先戴頭盔，本人並非於公營機構工作，所以唔會因公司而記住呢句Slogan。咁點解記得呢句Slogan，我諗大家都估到啦！究竟，現實中嘅打工仔，又會唔會勇於舉報同公司嘅上司呢？

　　先講吓上司究竟做咗咩咁令大家懷疑。事緣公司一向都會請Agency幫忙處理部分Marketing事宜，由度橋、部署、實行到事後檢討等，都會由agency一手包辦。一次大型宣傳活動，公司內部Marketing照Pitch一路用開嘅Agency G，但收到嘅Idea又貴又差，直頭冇可以改善嘅空間！眾人都同意出去貨比三家，睇吓市場上其他Agency嘅Idea及收費。但呢個貨比三家嘅消息一傳咗去Marketing大佬耳中，佢即刻call齊人召開大會，叫大家解釋一次Agency G 嘅提議。

　　「Good，個Idea幾好啊！點解仲要浪費時間搵其他？」

　　「因為我哋覺得個Idea好普通，又貴，所以想出去問多幾間先。同埋我地唔一定要用Agency嘅，可以問完偷橋架嘛？」

　　「我認為我哋一直同Agency G合作開就應該用返佢，咁先可以保持友好關係。你轉嚟轉去，其他公司又唔熟我哋脾性，到時又要浪費時間溝通，成果做得好唔好又冇保障，我覺得唔好，我唔批准！」

　　大家畀佢一嘢Ban咗後，心情都有啲唔Gur。你話Pitch Agency要用錢，唔批准就話啫！而家pitching根本就唔洗用錢，仲有機會可以用少啲錢，有更爆嘅效果，點解咁都唔批准？為件事好，啫係為公司好，咁都唔畀，你叫我哋點樣用心為你做嘢？所以，公司一班十項全能嘅Marketing同事，捱更抵夜，為咗打低白痴大佬，決定免費做埋Agency果份，諗咗條絕世好橋出嚟！橋夠爆，Budget夠低，時間夠充裕，直頭連Agency G聽完都拍手讚好，你話仲有咩理由可以畀人Turn Down？結果？Marketing大佬都堅持用返Agency！

　　「你哋條橋係幾特別，但係為咗確保呢個Project可以順利推出去，我決定用返Agency G，好多謝大家為咗公司咁努力。」

　　好嘢！高層果然係高層，講嘢不嬲都唔洗理由！總之，錢係佢嘅，約係佢簽，我哋班薯仔只可以聽話，眼白白睇住佢同Agency G簽約。嚟到呢度，Marketing大佬都係保持一眾白痴上司嘅水準，亂咁下決定啫，仲未至於產生要我地匿名舉報佢嘅衝動。但結果並非如此，之後發生嘅一件事，令到大家你眼望我眼，舉兵之心一觸即發……