2018年世界盃完美落幕，大家終於唔洗再捱夜睇波、爆住眼部微絲輸血管眼紅紅咁打住喊露返工。雖然辛苦，但對一眾等咗4年嘅球迷嚟講，一切都是值得的！因為世界盃風潮愈吹愈熱，網上流傳住唔少良心老闆、人情味公司，畀員工延遲返工時間，甚至直頭批准Home Office嘅夢想傳聞。嗱，良心公司我就冇做過。講真，出得社會做嘢，事事揸正嚟做係基本，有多當bonus，最多咪自己辛苦啲、訓少啲！不過咁喎，慣咗畀人SM嘅薯仔們，從來冇諗過自己畀上司SM，係咁有道理、咁信服人心㗎！ 

　　最近公司有個大project，大家一般都做到10點先收工，更唔好提event前夕。其實4強前嘅早場賽事，好多場都趕唔到miss咗，唯有睇中場同尾場。但愈近決賽周，大家嘅心情就愈見緊張，同時project嘅死線亦愈殺愈埋身！記得星期二晚，準決賽之戰：法國對比利時，兩大熱門球隊碰頭。決戰時間為香港深夜2點，男同事梗係急不及待想收工返屋企睇波，但第二日又有事要一早6點返到公司，有人索性向老闆提出借公司個私人浴室畀大家，咁大家就可以通宵喺公司用projector睇波，同時又可以爭取多啲時間休息，慳返舟車勞頓所用嘅時間。不過，隔幾層先溝通得到嘅老闆梗係理得你喇！大家由7點已經係WHATSAPP GROUP問，但等到11:30先得到老闆嘅回覆：「唔得」。好，EASY啦，咁咪唔睇波，趕頭趕命返屋企囉。但大家錯過咗呢場大賽已經好唔開心，將矛頭指向老闆。

　　幾日之後，亡命project終於完結。世界盃決賽晚仲唔係大家睇波加慶祝嘅好藉口？之但係，睇波緊要飲吓嘢、食吓嘢，食嘢又要畀錢，畀錢就梗係要有錢人喇，所以大家就諗咗條屎橋。約老闆齊齊睇波，一齊與民同樂，感受呢個4年一度嘅足球盛事。實質就打算到時屈老闆埋單，當慰勞大家辛苦幫公司完成大project。不過，見慣大風浪嘅老闆果然功力深厚，一句就將我哋呢班薯仔KO：「世界盃？其實美國人對世界盃冇乜興趣，我哋熱衷美式足球多啲！」最終，睇波錢梗係自備啦！

　　呢個故事教訓我哋，唔好將一啲你認為理所當然嘅事套落其他人身上。同時，想屈人找數之前，都要考慮埋對方嘅國籍同背景。下屆世界盃，如果想屈上司找數，記得唔好向美國、中國籍上司埋手，免得佢哋有藉口推搪！