繼上次傳出「深紅底」嘅教聯會副主席蔡若蓮將會敗部復活，出任教育局副局長嘅消息之後，呢幾日又傳出將有多一名「紅人」入管治班子，做民政事務局副局長，佢就係做緊團結香港基金副總幹事嘅李浩然。其實而家個局長劉江華都好似冇咩做咁，如果唔係傳李浩然做佢副手，可能好多人都唔記得咗民政事務局有咩做嚕。

　　齋聽「李浩然」真係個平凡得出奇嘅名，政界中人識佢嘅人唔多，事關Jenny問過某啲議員，都話未聽過佢個名。其實佢來頭都唔細㗎！可以話係一個「學霸」，佢讀過嘅學位Jenny一隻手都數唔晒，佢喺香港浸會大學讀完政治及國際關係，拎左個學位之後，仲不斷進修「拎沙紙」，包括香港中文大學政治與行政學系碩士、英國倫敦大學亞非學院政治、社會及發展學政治科學碩士、北京清華大學法學學士及法學博士。

　　不得不提李浩然喺清華讀書嘅時候仲跟過有「基本法小護法」之稱的清華大學法學院前院長王振民（現任中聯辦法律部長）學嘢添，據聞佢仲係王振民第一個「入室第子」，係王親手「湊大」嘅博士學生，專攻基本法同一國兩制研究，淨係呢Part CV都嚇死你！

邊個係黨員？咪咁陰謀論

　　清華畢業之後，李浩然就係貴州擔任縣長助理長達4年時間，民主黨議員林卓廷就對此非常狐疑，佢同Jenny講，有消息人士透露，李浩然喺內地做官時間比一般大學博士畢業生的「掛職」安排來得長好多，仲要李生係香港人呢個身份，不禁令佢質疑李浩然是否共產黨黨員。Jenny就覺得唔駛太陰謀論住，頭先咪講咗囉，李浩然師承王振民，咁以王振民嘅江湖地位，畀自己徒弟仔再坐一會，了解多啲國情，喺國內都係好正常嘅事來啫！

　　李浩然返咗香港後就擔任華潤集團戰略研究中心港澳台及海外研究室主任、中央政策組青年成員，之後轉去董建華嘅智庫「團結香港基金」做副總幹事，亦都係基本法推廣督導委員會委員，年約40嘅佢仲得到董伯伯力薦添！不過Jenny就有啲驚驚，董伯伯力薦有時都唔知係唔係一件好事，有議員仲同Jenny講笑咁講「佢（董建華）對上一個推薦嘅人係梁振英喎……」

保住蔡若蓮唔要李浩然

　　李浩然啲料聽落去就好似好勁啦，不過林卓廷就同Jenny講驚佢咁多年嚟都係讀書、讀書再讀書；研究、研究再研究，係唔係真係有能力落場實踐所場學呢？Jenny就調返轉頭諗，反正個局長（即劉江華）出咗來社會「實踐」咁多年，都係而家呢個款，真係畀一個學院派入去做副手可能有化學作用都唔定呢？只係背景「紅卜卜」，會激到泛民「面黑黑」啫，冇咩野嘅。

　　但係，泛民啲「媽媽」聲可能好快可以收返喇！皆因據Jenny最新收到嘅風，消息人士話，蔡若蓮做教育局副局幾乎已成定局，如果李浩然都做埋副局，可能又會引起好大爭議，為咗配合和諧主旋律，所以「話事人」就決定「棄李保蔡」，一於保住蔡若蓮唔要李浩然。如果係真嘅話，Jenny聽起來，有一下覺得李浩然有啲慘慘豬添。