空櫈又多幾張！Jenny講緊嘅係立法會啲櫈。今日政界大事一定係四個議員被DQ，建制派議員個個開香檳慶祝，泛民就苦瓜乾咁口面，皆因泛民已經失去分組點票嘅否決權，你話唔愁就假喇！今次判決喺行家之間都議論紛紛，因為研究完判詞之後，可能Jenny悟性低啦，都依然理解唔到尊唔尊重、真唔真誠嗰把尺係點樣訂，但官既然已經判咗，為免畀人話小妹藐視法庭，都係唔好喺度講太多喇！之但係，引伸出來新東、九西同港島嘅補選就勢必係一場大混戰，而潛藏喺建制派之內嘅心病似乎又會再浮面。

判詞話，梁國雄被DQ係因佢不符合莊重規定，指他開遮、叫口號及撕紙張，與宣誓真正目的無關。

泛民失否決權 各派補選大計早已「開波」

　　今次一次過DQ 4個議員都咪話唔震驚政界，4人「死因」各有不同，根據判詞Jenny其實覺得呢啲嘢真係好主觀噃，好似黃定光第一次宣誓時漏讀香港呢兩個字，結果都要宣第二次誓，係CY無去覆核佢啫。呢件事同梁游宣誓最唔同就係，梁游二人係連主席同監誓人都過唔到，但當日今次被DQ嘅4個人，當日係經立法會主席承認宣誓嘅，究竟而家咁判會唔會令人有違反三權分立之感呢？不過都係嗰句啦，Jenny唔係法律專業人士，都係在此提出一個疑問，亦歡迎讀者賜教，所謂活到老學到老吖嘛！

　　判就判咗喇，上唔上訴就仲未知，不過各派嘅補選大計一早已經「開波」。未DQ前，泛民喺地區直選有19席，建制就16席。今次一次過DQ多4個議員之後，九西、新東及港島就一共有５席要補選。而家泛民冇咗分組否決權，加上立會暑假後應該都未會完成補選，呢個「空窗期」足夠政府將所有具爭議的議案放上立法會審議，由建制派齊舉手通過，可謂零難度呀！唔通林鄭所謂嘅「合適的時機」就係呢個？

　　再者，除咗港島區只有1席要選之外，九西同新東都有2席。相信泛民各攞1席就唔係難事，但因為有兩區有2個位，喺比例代表制下，泛民又冇建制咁優質嘅配票機器，睇嚟都好難拎得返晒（連埋功能組別）全部共6張票喇！換言之，泛民同建制好有可能變成17對18席，分組點票否決權都係RIP！我估最開心嘅一定有一班問責官員份，皆因箍票功夫慳好多。

工記民記齊內訌 爭出戰打餐懵

　　九西同新東仲有兩個議席咁「肥仔」，兩大建制派梗係吼住唔放啦！喺新東嘅工記「阿彪」鄧家彪，一早就好勤力咁落區拉票，朋友仔同Jenny講佢仲朝朝嗌咪Morning Call，但街坊好似唔係好領情；佢仲好豪咁包晒一條線小巴嘅車身廣告，貼自己個嘜頭上去添！呢個位有傳MC興（王國興）都有意思來Battle一下！

　　民記當然唔會坐以待斃啦！早有準備開咗個特別中委會決定邊個去補選。咁民記喺新東又有咩人呢？Jenny就聽講，北區區議員姚銘、沙田區議員李世榮都第一時間舉手話自己想選，大埔區議員胡健民亦聽聞有意參加，但Jenny一睇！阿哥，有啲生面口噃！Jenny個「新東之友」朋友都話，唔好話其他區，就算新東人都未必識得晒佢哋喇！不過咁多人想玩，睇嚟未去到補選，喺民記裡面就已經爭崩頭、打餐懵先喇！

　　而九西暫時嚟睇，就應該係葉傲冬同鄭泳舜兩個最有機會出嚟。計Jenny話，既然兩個想咁想選，咪一齊出嚟選囉，皆大歡喜啦！只係但「爺爺」就頭痕些少喇，Jenny估最後總要犧牲一個，被丟低嗰個唔好嬲豬太耐啊！國家總會有任務畀你嘅！

泛民協調難度高 隨時畀人偷雞

　　其實一早有人話工記喺上次冇份玩配票就「嬲嬲豬」工記有人講起仲拍晒枱咁款，早前Jenny已收到風，民記想讓新界東個議席畀工聯會，但現而家突然喺黨入面搵人去選，好難唔令人覺得民記非但唔想讓位，更加想霸多個位，咁工記點算好？今次會唔會反枱㗎？

　　建制嗰邊就蠢蠢欲動，心病返晒嚟，但Jenny頭先都講咗，喺建制優質配票機制下，反而係泛民就應該要頭痕喇！咩派物派，N咁多山頭，唔係個個都易溝通，玩吓手會唔會連嗰3個議席都保唔住呢？而家Jenny聽聞民主黨、公民黨、工黨都探討緊出選可能性，雖然預計民主黨派人出選機會較高，但係除咗被褫奪議席嘅青政游蕙禎，似有意捲土重來外，學聯前常委張秀賢又話會積極考慮補選，而上年出選超區嘅民協何啟明，亦都宣佈積極考慮出戰九西補選。嘩！民協何生你都出嚟，咁咪好易同另一個何生（工聯會何啟明）炒埋一碟囉！