話咁快下個星期就8月喇！相傳8月1日政府就會公布首批副局長及政助名單。林鄭上咗場之後，大家就由「估局長」改為「估副局」，估足成個月，有啲係「紅人」，有啲就夠平易近人。Jenny最新收到嘅風，就係食衛局副局長將會係聯合醫院院長徐德義，政制及內地事務局就可能有「新聞王子」吳璟儁做政助。至於教育局呢……

「大紅人」蔡若蓮冇影，陳浩濂金榜題名

　　大家最關心嘅，相信都係教育局嘅寶座係唔係真係由極深紅底嘅蔡若蓮奪得？Oops……Sorry！今次Jenny手上份名單就只係出咗一半嘅人選咋，暫時就未見教育局嘅料，小妹在此要學林鄭講一句：「請大家耐心等候」喇！反而上次Jenny都有份估嘅自由黨陳浩濂果真榜上有名！如果六合彩都咁易中就好喇！上次有成8000萬啊……

徐德義曾為鄧桂思事件出面道歉

　　喺呢半份名單入面，Jenny見到一啲熟悉嘅名噃！其中一個就係食衛局嘅副局長將會係聯合醫院院長徐德義出任，去協助返護士出身局長陳肇始同啲醫生溝通。大家係咪覺得個名熟口熟面，但又噏唔出佢係邊個呢？其實佢就係聯合醫院嘅行政總監，即係發生「鄧桂思事件」嗰間醫院呢！佢之前就要因為事件而出嚟向家屬道歉，個大頭都出現過喺新聞唔少次！相信唔會好似前商經局副局梁敬國咁變「路人甲」，行咗入立法會都冇人識。

　　大家可能會諗，聯合嗰次搞咗咁大壇嘢出嚟，仲搵佢哋個行政總監做副局？唔好啦卦！留意返，立法會都喺暑假之前三讀過咗《道歉條例草案》，爭在政府未刊憲啫！即係話，以後道咗歉都唔代表你承認咗個責任喺你到㗎！而家佢出過面Say Sorry，反而畀人一個有承擔嘅感覺。所以話：大家唔使驚，Doctor徐喺大廳！

吳璟儁或做政助 譚志源曾被餵檸檬？

　　另一個熟悉的名字，就唔只Jenny熟，應該一眾女讀者都唔陌生㗎啦！佢就係大台嘅首席記者吳璟儁喇！吳璟儁係讀中大嘅政治與行政學畢業，份名單話佢會去政制及內地事務局做政治助理，都幾啱佢嘅學術範圍吖！

　　大家見佢喺大台做「講清講楚」嘅時候就成日逼到官員吐真言，可惜一講到係咪做政助，佢就唔肯同我哋啲行家「講清講楚」，只係肯覆「工作如常，多謝關心」咁大把咋。Jenny噚日仲喺立法會撞到佢，當時佢傾緊電話，好似好忙咁，Jenny都係唔敢上前打擾喇，估唔到今日就流出呢份名單，真係耐人尋味！

　　不過，Jenny聽聞上屆嘅政制及內地事務局局長譚志源同首席記者係中學師兄弟，譚志源一早想拉師弟入局實行「兄弟班」，結果慘被餵檸檬，大家覺得聶局長今次係咪可以成功「得米」呢？下個禮拜你咪知囉！