今屆行會非官守成員入面，好多面孔大家都好熟悉，皆因唔少人都一向活躍於政商界。Jenny就成日都覺得林正財醫生同其他行會成員好唔同，可能係因為佢比較低調，平日出活動少見到佢吧！不過一向好低調嘅佢，今日就應邀出席一個同長者有關嘅活動啟動禮，因為係同佢一直關心嘅安老議題有關！

退休做Project 做創新生力軍？

　　主辦「黃金新動力」嘅黃金時代基金會創辦人容蔡美碧(Rebecca)介紹活動嘅時候話，機構係以社會創新嘅方式去應對人口高齡化嘅現象，呢個活動就係自在集結同培訓45歲以上嘅人士成為社會創新嘅生力軍，實行「退而不休」嘅概念。佢仲話主辦機構有幾十個申請者入邊揀咗10個有心有力嘅學員，培訓佢哋兩個月，引領佢哋對未來發展作深層思考同埋實現創新嘅概念。呢班學員仲要係課程當中做Research、做功課，Jenny真係佩服佢哋「退而不休」嘅毅力，畀著係我，退咗休都淨係想攤抖下咋！

活到110歲 人生規劃嚟多轉

　　林醫生似乎就好了解好似Jenny呢類懶人嘅諗法，佢話以前啲人好早就過身，所以退休年齡先會係60歲，等佢哋唔使「做到死」。但係而家醫療咁先進，可能退休之後嘅時間仲長過退休之前，所以60歲退休已經完全唔切合實際情況喇！

　　林醫生又提到，之前先同外母慶祝91歲生日嘅時候，講笑咁同老婆講，既然佢媽媽都有91歲，相信佢哋都有110歲喇！仲話如果60歲退休，即係仲有成50年嘅生活要過，睇嚟都要做返個人生規劃先得！Jenny諗返起，上屆教育局局長吳克儉就叫學生做好人生規劃，而家連長輩都一樣要做人生規劃，完全係體現「活到老學到老！」

全民退保料無影

　　講時講，有唔少政黨都已經見咗特首林鄭，向《施政報告》提意見，當中都有涉及安老同埋退保議題，希望可以有全民退保。不過，據Jenny所知因為林鄭有份做上屆政府嘅退保諮詢，佢參選嗰時又講過好多次同意當時CY政府嘅結論，所以照計佢份《施政報告》會延續上屆政府退保政策，主要改善長者生活津貼同埋研究利用公共年金，去改善長者嘅退休生活喇！