東江水又加價喇！東江水貴已經唔係咩新鮮事，但睇見加價點都赤一赤。Jenny今日睇到份發展局向立法會提交嘅文件，話政府將與廣東省簽新嘅東江水供港協議，兩邊都同意未來3年水價每年會加0.3%，即係2018年水價係47.93億、2019年係48.07億同埋2020年係48.21億，總開支夾夾埋埋有成144.2億㗎！不過，剛剛睇返港珠澳大橋最新進度，又超支100億，一時間Jenny對億億聲有啲麻木添......

今次新簽嘅東江水協議就比上一次total貴咗成6.9%。

三年又三年 加埋百幾億

　　其實粵港兩地每3年會就東江水供港簽一次協議，今次就話每年加價0.3%，正所謂：「三年又三年」，根據複息效應，條數咁加落去都幾甘！今次新協議就比上一次total貴咗成6.9%。

　　Jenny 有時都會諗，其實港鐵同東江水一樣年年加，但港鐵掛名都叫有個「可加可減機制」，至少畀Jenny可以FF（幻想）佢有日會減價，但係東江水就冇呢個機制喇，真係諗都唔使諗。

　嗱！唔只得小妹一個咁諗㗎！號稱「東江水專家」嘅香港願景計劃高級研究員羅祥國就喺今年４月已經建議，東江水都可以參照呢個「可加可減機制」，以內地同埋香港工資同物價變動率計算價格調整。不過講返轉頭吖，Jenny已經好耐冇見過物價有下降，而且睇住港鐵都係年年咁加法，Jenny都唔知有機制好定冇機制好了……

我啲「水」呢？召喚大嘥鬼！

　　雖說水價年年加，不過新協議入面就話，每年供水量嘅上限就仍然係8.2億萬立方米。都係嘅，據Jenny所知香港從2006年開始就係以「統包總額」嘅方式買東江水，即係一買就係買咗固定嘅份量。之但係香港年年都用唔晒買返嚟嘅水，但用唔晒嘅水又唔可以搵內地「回水」噃！所以香港差唔多每年都億億聲咁倒錢落海！

　　政府一面叫人慳水，轉頭又倒晒我哋荷包啲「水」落海，睇嚟呢個份量都係「有減冇加」好啲喇，好似「大嘥鬼」教落：用得晒先至好買吖嘛！

　　其實建制同泛民都有議員建議過東江水按量收費，用幾多畀幾多，不過內地嗰邊就「溫提」大家，如果用按量買水嘅方式，分分鐘個價比「統包總額」仲高咁話！政府又話今次水價加幅合理，睇嚟大家都係要繼續倒「水」喇！小妹希望水費之後唔好加啦......