特首林鄭月娥個新班子冇耐之前先「齊腳」，點知今日就有聲稱「可靠」嘅消息爆出，話律政司司長袁國強最快會喺下個月辭職，做返大律師。仲話林太一早就知，而家揀蟀嘅工作都已經去到尾聲，估計係由律政司法律政策專員黃惠沖(Wesley)接棒。消息一出，Jenny都嚇咗一跳，明明記得一直收返來嘅風，都話袁司長會搞掂「一地兩檢」先拜拜㗎？

一地兩檢上正軌 袁司長功成身退？

　　有行家就同小妹分析，而家一地兩檢都開展咗第一步，下個月上埋人大就完成埋第二步，都叫做上晒正軌，司長呢個時候退落嚟都好正常。行家就好快手去搵司長「身邊人」求證，仲話已經Plan埋Farewell添！講到實牙實齒咁!Jenny循例都想問下當事人，可惜今日撞唔到袁司長，所以只好律政司司長辦公室求證，發言人冇否認又冇承認，只係非常官腔咁答咗句：「我哋唔會評論有關傳聞」。

　　Jenny唯有向一班議員打探打探啦！律師圈子話大唔大話細唔細，袁司長出山做返大律師咁大件事，有「律師黨」之稱嘅公民黨成員可能點都收到風掛？ 

郭榮鏗爆另一版本 袁國強1月辭職

　　嗱！Jenny就喺郭榮鏗口中打探咗另一個版本喇！佢話收到風袁司長係下年1月先辭職，唔係傳言中嘅12月。而且接任人係外聘人士，未必係Wesley喎！佢仲話Wesley都係好嘅人選，不過聽人講佢想做法官，如果做官就唔係咁方便啦！

　　陳淑莊(Tanya)仲大爆原來Wesley係佢大學師兄，仲話Wesley喺大學時期係風頭躉，又Smart又勁，頭腦又清晰，連佢呢啲「走堂精」都識佢！佢話印象中Wesley就好似冇乜處理過政治Case，不過Tanya覺得如果律政司想內部擢升嘅話，Wesley係應該同同事易夾啲嘅！

建制律師齊封口

　　楊岳橋(AY)就乘機同Jenny呻，喺袁國強嘅任期內，出現咗一地兩檢、釋法、政改同埋13+3刑期覆核嘅議題，令人覺得法治差咗好多，佢仲話「如果我嘅標準係黃仁龍嘅話，佢（袁國強）差太遠喇！」對於熱門人選Wesley，睇來佢唔似黨友Tanya咁熟Wesley，佢話唔評論，不過就寄語，邊個做都好，希望新任司長唔好主動走去釋法喎！

　　立法會咁多律師，Jenny梗係問埋建制背景嘅仲有冇獨家消息提供啦！點知經民聯嘅梁美芬（芬姐）話佢都收到風，但係見到記者就耍手擰頭，丟低一句「唔會就傳言評論」就閃人。民建聯周浩鼎就話而家暫時得「謠言」傳出，自己唔評論喇！不過阿鼎，「謠言」同「傳言」又唔同喎！唔通鼎鼎都有獨家消息，知道司長唔會辭職住？