做議員除咗開會，仲要緊貼時事，睇多啲新聞先得㗎！大家睇吓民建聯（民記）嘅陳恒鑌（阿Ben），佢今日就喺Facebook同大家講佢睇完報紙嘅報道之後嘅感受。咪住先！作為民記中人，睇蘋果冇問題，但竟然公然Share美國議員提名發起雨傘運動嘅「雙學三子」（黃之鋒、羅冠聰和周永康）拎諾貝爾和平獎，嘩！阿Ben你大逆不道呀！

咁......算唔算知錯能改?(陳恒鑌fb截圖)

諾貝爾變「諾先生」 司馬文係咪都要叫「司先生」

　　不過大家可以稍安毋躁，事關阿Ben都係想話抒發吓佢「獨到」嘅睇法啫！佢話呢個係對諾貝爾嘅侮辱同諾貝爾獎大幅貶值嘅「又一例子」，仲話「如果諾先生還在生，一定會被激到噴血並即時取消和平獎！」又咪住先，「諾先生」？邊位？Jenny橫睇掂睇，成段字都係得「諾貝爾」呢個人名出現過，阿Ben係咪想講佢？但係留意返，「諾貝爾」個名係Alfred Nobel噃！阿Ben就咁叫人「諾先生」，咁以後撞到司馬文（Paul Zimmerman）咪要叫佢「司先生」？「司先生」應該都會被激到噴血......

阿Ben唔開心 話大家放錯重點

　　阿Ben平時啲Post就多數都係百幾個Like，今次「事故」一出，個Post幾個鐘就有千幾個回應，有笑有Like有嬲嬲，係佢平時啲Post嘅10倍呀！群情咁洶湧，阿Ben都知「瀨嘢」，咋咋臨Edit咗個Post，括返個英文名Alfred Nobel，但依然堅持叫返「諾先生」噃！

　　短短幾個小時變網絡紅人，幾多人恨都恨唔到！不過阿Ben就似乎唔太開心喇，話大家唔好轉移視線，應該放返個焦點喺三子唔應該獲提名，因為佢哋係「破壞香港繁榮安定」，提名係「荒謬」添！不過阿Ben都應該事與願違喇！事關一個持續咗兩年、明明個重點係講評分標準不公嘅大學普通話試爭議，最終個焦點都可以落喺一個粗口上面，由此路進……阿Ben想個討論去返三人應唔應該拎獎，Jenny覺得睇怕都幾難嚕！睇開啲啦阿Ben！