國學大師饒宗頤今日凌晨逝世，享年101歲。今朝各方名人都紛紛哀悼，饒公嘅弟子、前港大副校長李焯芬話饒公係睡夢中安詳離世，沒病痛之下離開，都算係種福氣。而特首林鄭亦都有出文哀悼，大讚饒公係「香港和世界在學術和藝術界的瑰寶」。如今饒公仙逝，恕小妹見識不多，實在想不出如此曠世之才仍在世的還有何人。

「南饒北季」「一身而兼三絕」

　　一眾年輕讀者可能對饒公唔太認識，其實饒公學問成就涵蓋國學各方面，歷史、文學、語言、文字、宗教、哲學、音樂無一不曉，你可以話佢係歷史學家、考古學家、文學家、經濟學家、教育學家和書畫家都得。佢更加精通梵文，與已故的國學大師季羡林齊名，所以學界有言：「南饒北季」。饒公文、藝、學三者兼備，絕對不負「一身而兼三絕」嘅讚美。

「饒荷」中外負盛名 

　　對於國學Jenny認識有限，小妹最喜歡嘅還是饒公所畫嘅「饒荷」。出自其手荷花，就如其人。萬千形態之中，或簡約或繁複，錘鍊的筆法，總可讓你看出畫者涵養之高。無怪乎，有人甚至「饒荷」著書，探討當中蘊涵的文化含義，教導如何賞析佳作。

　　饒公如此鍾意畫荷花，皆因佢父親改佢個名叫「宗頤」，就係希望佢宗法宋代理學大師周敦頤，而周敦頤都好喜愛荷花，亦係一個好似荷花咁「出淤泥而不染」嘅君子。Jenny覺得，饒公真係將佢個名活出咗典範，無負佢父親對佢嘅期望。

　　饒公如此德高望重，不少人都十分尊敬佢，林鄭、張建宗、劉江華都公布發文哀悼。林鄭去開行會前同Jenny講，上年10月先同饒公喺禮賓府茶聚，饒公當時嘅健康狀況唔錯，亦都好開心咁食咗一啲點心，又去咗睇佢掛喺禮賓府好多年嘅書畫同埋荷花作品。

　　各位讀者如果想認識更多饒公，同懷緬呢位國學泰斗，不妨去美孚的饒宗頤文化館參觀。

　　饒公，一路好走！