Jenny今朝一起身，就收到消息話保安局局長李家超中午會見記者，但係就冇講明咩事，唔通警方已經搵到上次真槍事件嗰枝槍嘅來源？定係一地兩檢有新嘢？都唔係！原來係關陳浩天事……

　　不過講起陳浩天，唔知有幾多人真係記得佢係邊個？有讀者或者會即時答：「陳浩南同陳浩民我就識！」。嗱！講埋佢個黨「香港民族黨」，大家或許先會記得少少係個主張港獨嘅組織。但係佢哋自成立之後，做過啲乜，Jenny已然冇乜印象……

點解香港民族黨冇註冊成為一個社團，都受到社團事務主任監管？李局長就答........

又嚟得「主任」得天下？

　　其實林鄭政府啱啱上任一周年，各方對佢嘅評價雖然未去到盛讚，但都認同係開局良好，而港獨呢個議題，最近已經冇乜人講。Jenny仲估，以而家呢個政治風向，話唔定都對建制喺今年補選同下年區選嘅選情有利，點知！今日無啦啦就彈出呢壇嘢，話「助理社團事務主任建議保安局局長，行使《社團條例》第８條禁止香港民族黨繼續運作」，將本身已沉沉地嘅港獨思潮又拉返上水面！同埋又係「主任」？香港啲「主任」真係好唔得閒噃！DQ一個人要靠「選舉主任」，DQ一個黨就要靠「助理社團事務主任」！

無端起浪 再惹社會紛爭不利建制選情

　　Jenny同一啲行家就覺得，政府而家嚟搞啲咁嘅嘢，無疑係將林鄭好唔容易先緩和咗嘅社會氣氛又分裂返！不過亦都唔排除有一個可能性，就係政府想為《基本法》23條試下水溫，搵個大家都就嚟唔記得嘅政黨嚟做返個實驗咁？雖則呢個諗法今日就畀保安局局長李家超否認咗，但至於你信不信……

　　不過Jenny就覺得，以本身個情況嚟睇，港獨思潮已經冇咩人理，基本上社會上大家都有共識係唔可行，根據香港人善忘嘅特質，本來好地地「唔講就唔再存在」，而家攪一攪，可謂激起千層浪，真係唔做好過做，政府喺呢個位，係唔係欠缺咗啲政治智慧呢？