香港律師會改選都過咗成5個月，今屆佢哋就出咗個「百年一遇」嘅女會長，Jenny同行家們梗係要捕實佢喇！之不過呢位女會長彭韻僖律師就好似好怕傳媒咁！「關公」睇嚟要幫手Train Train好噃！

彭會長(中)同活動嘅籌委會主席湯文龍(右)一聽到「港獨」就即時耍手擰頭。

民族黨問題一律唔答

　　是咁的，除咗律師會自己搞嘅活動，只係正式搞咗一次茶聚見見傳媒打下招呼咋！不過大家都知，而家香港咁多政治事件，根據官方說法都係牽涉到《基本法》，行家們當然想搵多啲法律界人士評論下、解釋下當中因果。仲記得彭會長第一次同傳媒茶聚，就撞正香港民族黨收到被警方建議以《社團條例》取締的通知，行家當然係追住嚟問，當時彭會長就以事件「啱啱發生」為由，乜都話「唔知、唔講住」，令大家好無癮呀！

　　事隔數月，連民族黨都真係被取締埋之後，Jenny同行家今日又見到彭會長喇！事關佢哋律師會就打算搞個青少年活動，所以事先舉行個傳媒午宴介紹一下。隔咗咁耐，Jenny同行家心諗「機會嚟喇！」，今次彭會長應該都「準備充足」喇啩？點知彭會長又話而家仲喺30日嘅上訴期內，都係「唔評論」！彭會長，你唔係天真得以為行家會只關心個活動啩？

聞「港獨」即耍手擰頭

　　午宴之際，彭會長同今次活動嘅籌委會主席湯文龍（Roden）就同行家講起，下年嘅主題應該講咩好。有行家就打趣話「做（校園應否討論）『港獨』喇！一定好多傳媒報道！」彭會長同Roden就即時耍手擰頭，話點樣做、學校肯唔肯Join都係一個問題喎！睇嚟律師會上下都好驚講中呢個Keyword，連講反對意見都唔敢提出嚟。計Jenny話，其實「港獨」呢兩隻字又有咩好怕喎！只要政治正確就得喇！好似教育局長楊潤雄同行會召集人陳智思咁答：「可以討論，但結果一定係不可行！」咁就一定唔會踩中地雷啦！係咪先？