前立法會主席、民建聯曾鈺成同社民連梁國雄（長毛）呢對收視孖寶又出動喇！香港人有時真係好矛盾，呢頭講愛好和平，嗰頭又鐘意睇人嗌下交，因為咁先有娛樂性咁話，所以呢對政見南轅北轍嘅「孖寶」之前幫小小超個電視台拍咗個真人騷成功刺激收視，仲引發網民無限想像力！電視台今次捉到鹿識脫角呀！再搵佢哋拍節目，今次節目預告片見到兩位齊齊去睇樓，唔通係物色「愛巢」？

 300零萬買到乜？

　　其實佢哋睇嘅樓係人哋嘅公屋嚟，有得睇冇得買。嗱！上一輩香港人，以脫離公屋上車為榮，時移世易，到咗而家網絡上有句金句「得公屋得天下」，一講到「住」喇喎，香港人就會全身神經都變得非常敏感！今次小小超電視台就一於搞個新節目《人住公屋我住公屋》，曾前主席同長毛「雙雙出動」，去咗林鄭都話要借鏡嘅新加坡，參觀當地組屋，節目預告片入面剪咗少少二人睇樓片段，其中有間屋成間豪宅咁，曾前主席都要大叫：「嘩！千一呎！300零萬呀！」然後就有把疑似長毛嘅聲音回應：「唉……300零萬……」等Jenny幫你駁埋下一句啦，「香港300零萬淨買到200呎唔夠劏房盤咋！」

申訴專員鬧房屋署嘥晒屋邨地方

　　咁啱申訴專員公署今日公布調查，發現房屋署轄下公共屋邨有接近960個閒置儲物室，浪費咗接近11萬平方呎，其中有啲單一空間仲有成700幾呎咁多，所以鬧房署冇審時度勢，珍惜土地資源，建議房署積極考慮將閒置儲物室改建成住宅，畀住屋環境水深火熱市民可以早啲上樓。房署就話其實都做緊嘢喇！有40個呢啲儲物室改咗做住宅，遲下仲有30間會改建。

　　長毛就住緊公屋，曾前主席就住私樓，呢對孖寶去獅城睇人地靚過又大過香港私樓嘅公屋，唔知會有咩感悟呢？其實Jenny就想睇吓電視台可以點剪輯，令到佢哋對話如何繼續引起網民無限遐想喇！唔係Jenny灰，而係香港土地房屋困局始終有理說不清。