起咗咁耐、估來估去，政府終於宣布千億基建港珠澳大橋下個禮拜三通車喇!港府今日安排傳媒登橋參觀，又點少得Jenny呢!Jenny見香港口岸人工島都仲有工程人員趕緊工，裝緊路牌。好彩大橋上面仲收到香港網絡訊號，等Jenny可以即刻自拍、打下卡、呃下like吖嘛，你知啦，第時就車來車往仲點會有機會畀小妹喺橋上Free Run!

香港段車路上面會油咗HONG KONG 字樣，第時就車來車往就冇Free Run喇!

過咗海關「右上左落」

　　坐住運房局提供嘅「港珠澳穿梭巴士」係由人工島去到中港邊界，車程大約廿分鐘咁上下啦，邊界有一條啡色線標示，而家暫時就有鐵絲網分隔住。

　　記住喇！經過咗衞生署同海關關卡之後，香港連接路部分行車方向就會變成內地嘅「右上左落」喇!不過放心，沿途指示牌仲係用繁體中文同英文。雖然仲有個鐵絲網隔住，Jenny望過去內地嗰邊，指示牌就當然印簡體字，地下仲印埋「廣東」兩個字嘅簡體字，橋上電子顯示牌一路顯示住「港珠澳大橋歡迎您」，一定唔會唔知自己去咗邊!

　　路政署主要工程管理處處長江大榮同Jenny講，車輛通關廣場一共有52個檢查亭，個個會提供一站式檢查服務，包括衛生檢疫，入境檢查等等。聽落又幾快、靚、正噃！

今日在鐵絲網邊緣，做個「網中人」。

漏水問題已解決？

　　講返口岸人工島個旅檢大樓先，上層出境，下層入境，就咁望上去工程就基本上完成，但商店舖位就未開，冇得shopping住。講時講，之前大樓地庫落雨漏水，之後「試水」天幕都至少仲有3處漏水......Jenny同行家都好關心而家搞返好未呢?運房局局長陳帆就回應話，經歷過超強颱風山竹嘅考驗，相信大樓的防風及防水功能都係良好咁話。嗱！雖然大樓個特色設計係有20個水池，但應該唔預用嚟裝雨水呀！

旅檢大樓下層入境處位置。今日冇落雨，測試唔到個天幕有冇漏水。

　　大橋通車鍾意試新嘢嘅讀者係咪都想去打個轉呢?運輸署副署長李萃珍就同Jenny講，有小巴、巴士、的士同旅遊巴去大橋香港口岸，之後就轉乘穿梭巴士去澳門、珠海，穿梭巴士(即係Jenny今日搭嗰架呢)，日間收費就65大元，夜晚就貴少少70大元，小童、長者同傷殘人士半價。仲有其他旅遊巴由港九市區出發，車費最平120大元有交易！

去澳門、珠海嘅穿梭巴士，因為車身金色又名「金巴士」。

記得預約到車位先好揸車去

　　唔想搭巴士可以自己揸車，不過通車初期跨境私家車要先拎到配額，先可以駛上大橋暢遊港珠澳。據Jenny所知，兩地政府早前同意，開通初期會發放1萬個配額畀香港跨境私家車，橋未開通就最多只發5000張「許可證」，到大橋啟用3個月後會額外發出最多3000張「許可證」。所以冇「許可證」就要喺香港大橋口岸放低架車喇，唔好話Jenny唔提提大家，記得預先網上預約車位啊!如果唔係泊車費貴好多㗎!有預約泊一日先150大元，如果冇預約就要成910大元一日，到時真係食咗你隻車呀!

冇人民幣喺身唔緊要，可以用支付寶買穿梭巴士車飛！