近日建制派不約而同就推遲9月立法會選舉表達意見，主要係受疫情第三波影響，以致可能出現選舉不公。唔公平並唔係候選人少咗接觸選民，而係唔少港人喺內地長居，平時都可以喺投票日返來香港投票，但疫情之下，呢班人唔能夠返香港選，自自然然會令到部分候選人感到不公，因而齊齊出聲要求延遲。

　　按政府統計處嘅「通常逗留喺廣東省香港居民統計數字」，2019年中總數約54萬人。呢個係包括大人小朋友，當三分一人係細過18歲無投票權，講緊嘅都係36萬人；再打多個折扣，喺疫情於內地爆發初期有班人已經回流返香港，當一半人口，依家講緊嘅都有18萬人喺內地，受制於檢疫措施同現時香港疫情，唔返得香港。

　　18萬呢個數，佔2019年區議員投票人總數294萬超過5%，話多唔多，話少亦唔少。18萬人唔敢講全部投票建制派，但八成甚或至九成係支持建制，點都無乜走雞。用呢個票數去睇返2016年超級區議會個議席，真係唔係細數目；當年建制三條隊合共拎左80萬票，萬一無十幾萬票，出兩隊贏兩席超區都還可以，但萬一自由黨參戰有三隊人馬，得返一席都唔係話無可能。

　　而最重要一點，大家會發現建制大合奏要政府推後選舉，除咗係疫情影響之外，更加係喺民主派初選之後。初選總投票人數達到60萬之多，多區大排長龍，氣氛之熱烈遠遠超過初選前嘅冷淡，Tina大跌眼鏡，據聞有關數字令到建制以至西環非常吃驚。對上一次區議會選舉由於西環部署過於樂觀以至選舉大敗，今次立法會選舉早已經預咗要打硬仗，見到初選都有60萬人投票，幾可肯定上年區選投票泛民嘅市民，轉軚或者棄投基本上已無望，建制唯一能做就係守穩自己地盤，同再喺配票上多做功夫(下回再分解建制策略)。亦可能因為咁，建制數過票之下，擔心喺內地居住嘅港人萬一真係無返來投票，對建制只係有害無利，所以先動用到元老級譚耀宗開聲，再配合幾位建制派尋求連任嘅議員和唱，要求政府考慮一下推遲選舉。

　　要推遲，技術上有好多問題要解決，例如推到幾時邊個話得埋？推後三個月到時疫情第四波又要再推？推遲咗法案要過咁點搞？係唔係現任議員可以繼續做去審議？推遲到去明年的話，咁財政預算案又點搞？政府會唔會停擺？一連串嘅問題牽一髮動全身。但Tina相信有問題要解決只不過係藉口，最大嘅難題阿爺都一錘定音幫香港解決，推遲立法會選舉，要解決的話又有幾難呢？