行政會議噚日(28日)召開會議，開咗大半日，無任何公布。不過去到昨晚就開始有消息喺媒體傳出，政府已經初步決定將今年立法會選舉延後一年，去到明年九月再選。

　　誠如Tina上星期所講，延期呢個決定可以話係建制大合奏出嚟嘅成果，係一個預早知道嘅結局，問題只係延期多久嘅考量，同埋延期期間立法會真空點樣處理。

　　據接近添馬消息透露，延期多久係成員爭拗得最耐嘅議題。檯面上嘅方案有幾個，最短係續14日延期、延三個月、六個月、一年，最長去到兩年咁耐。短過一年嘅方案好快就被推翻唔可行，最重要嘅係，大家依家都唔知疫情會點，去到冬天又會唔會爆第四波，所以一年已經係延期選舉嘅起步點。

　　延一年似乎係正常人能夠理解嘅方案，但點解又會有延兩年嘅考量？據聞提出延兩年嘅，係考慮到明年同一時間已經係特首選委嘅選舉，兩個選舉撞埋一齊，擔心操作上有問題，而且2022年選立法會，喺特首選舉之後一年搞，都唔係無可取之處。但綜合兩個方案優缺點，政府始終認為，延期一年係較為令市民接受，亦可減低延期對政治體制嘅影響，所以最終都係拍板一年呢個方案。

　　拍板咗又唔正式公布？呢個最主要就係任何延期都涉及基本法嘅解釋，呢個就一定要有最終解釋權嘅人大去搞，而政府上報咗個方案畀人大，人大ok咗，林鄭先敢公諸於世，所以估計要提名期完結之後先會有正式公布，同埋延期嘅一系列後續影響，包括未來一年立法會點運作、係唔係現屆議員冧莊多一年等等。

　　不過最有趣嘅係，如果政府委任現屆議員做多一年「臨立會」，咁泛民議員又制唔制？泛民尷尬之處，接受委任的話等於要佢地接受人大釋法，呢個好影響佢地支持者心目中嘅形象；唔接受的話，政府委任其他建制入立法會，未來一年政府提上立法會嘅法案將會予取予攜。

　　另外有建制仲講笑咁話：「延期一年好呀，對建制非常有利，喺內地嘅港人可以返港投票之外，出年一月持BNO人士可以申請移民英國，多啲黃絲走，此消彼長，建制肯定無輸得咁慘！」似乎今次決定延期選舉，對建制而言真係一石數鳥！