唔知大家習慣咗用麥記嘅Touch Screen點餐機未呢？定係一定要行返去櫃檯，自己親口嗌嘢食呢？

　　呢個已經有61年歷史嘅快餐品牌喺2014年開始，陸續喺世界各地推出Touch Screen點餐機，測試市場反應。香港亦係2015年，首先喺銅鑼灣同九龍塘推出。到而家應該絕大部分嘅分店都有幾部機俾人Self Service。麥記官方解釋係希望提供更佳客戶體驗，令客戶可以揀選更個人化選擇 (部機提供走醬、走青瓜、走芝士、走花生、加大等要求)。

　　以往喺麥記買嘢食，大部分人都會喺排隊嘅時候就已經諗定叫乜嘢。

　　「一個魚柳Bell Chan，可樂少冰，攞走，唔該。」

　　「八達通。」

　　如果唔計排隊，成個過程大約只係8至9秒。但而家用咗Touch Screen，由於面對嘅只係一塊電子屏幕，相比面對真人落單，客戶嘅點餐壓力會減低。佢哋可以用更多時間面對電子屏幕，考慮揀選購買邊種食品。

　　從前，你喺排隊嘅時候已經諗定要買邊3樣嘢食，但而家，你喺面對touch screen嘅時候，先喺menu上「最後決定」要食啲咩。情況就好似喺網上shopping，你用嘅時間愈多，睇到嘅選擇愈多，買嘅嘢自然愈多。

　　而麥記亦計劃喺2017年上半年，喺部分地區推出手機落單服務，模式同而家Starbucks嘅Mobile App落單相似。客戶預先係手機App上落單，然後用各種Mobile Payment俾錢之後，就可以喺分店取餐。

　　麥記其中一個最大嘅賣點就係「方便」：梗有一間喺左近、買嘢食快、出餐快，食完一餐都只不過係15分鐘。但相比起而家嘅手機應用發展，麥記喺呢一方面起步的確比較遲。所以有報導指麥記今年將會投資17億美元，優化世界各地分店嘅設施同科技配套。

　　而Touch Screen點餐機作為科技化第一步，另一個功能就係可以先讓客戶熟習自助點餐服務，收集用戶點餐喜好、付款方式等數據，為下一步推出手機App做準備。

　　科技發展同手機App嘅普及的確無可避免，但而家缺乏同「麥當勞姐姐」Interaction嘅「親切體驗」，又的確令我有少少失落。而家每一次去到麥記，面對冷冰冰嘅Touch Screen，反而令我有啲掛住「巨無霸急口令」嘅年代。

　　雙層牛肉巨無霸，

　　醬汁洋蔥夾青瓜，

　　芝士生菜加芝麻，

　　人人食過笑哈哈！